Halili: Suspendimi ishte masë e ngutshme

Gjilan – Afrim Halili ish komandant në stacionin policor në Viti për rajonipress thotë se nuk ka pasur asnjë arsye që ai edhe katër kolegët e tij të suspendohen. Të gjitha veprimet e nevojshme dhe të domosdoshme janë ndërmarrë ditën kritike , madje edhe vetë isha i pranishëm në vendngjarje, ku bëra përpjekje maksimale për ta ndaluar turmën. Thotë se në vend të suspendimit është dashur të marrë mirënjohje.

Suspendimi i pesë pjesëtarëve të policisë në rajonin e Vitisë duke përfshirë edhe komandantin dhe përcjellësit e tij është komentuar në forma të ndryshme në vet qytetin e Vitisë.

Menjëherë pas rrezmit të një përmendoreje që i takonte periudhës së LNÇ-së në Viti , komanda qendrore pati suspenduar nga detyra Afrim Halilin komandant i stacionit policor në Viti, Rashit Rashitin zëvendës i tij, Isa Dili- rreshter, Mehmet Pira dhe Agim Demiri oficer. Të gjithë këta janë suspenduar me arsyetimin se kanë neglizhuar ditën kritike.

Por ndryshe mendon Afrim Halili. I kontaktuar nga rajonipress , Halili tha se masa e suspendimit ka qenë e ngutshme dhe nuk ka pasur asnjë arsyeje që të ndërmerret ky hap. “E tërë ngjarja ka qenë e mbuluar 100 % dhe janë ndërmarrë të gjitha veprimet e duhura ku ka edhe prova dhe dëshmi. Madje edhe vet kam qenë i pranishëm në mesin e turmës ku kamë bërë përpjekje maksimale që ta ndaloj eskavatorin. Profesionalisht kemi vepruar drejtë dhe me kohë” rrëfen Halili.

Halili tha se për 8 vite sa ka qenë komandant i stacionit policor në Viti ka qenë i përkushtuar që në këtë qytet të sjellë siguri dhe klimë të mirë ndëretnike e ndër njerëzore.”Ne kemi kaluar sfida edhe më të mëdha dhe ky rast gjithashtu ka qenë i përcjellur në mënyrë profesionale, duke i mbuluar të gjitha pikat, duke i ndërmarrë të gjitha hapat parandalues. Bile mendoj se në vend të suspendimit ne është dashur të marrim mirënjohje sepse kemi komunikuar dhe i kemi lutur organizatorët që të stopojnë veprimet e tyre” tha Halili.

Halili tha se masa e suspendimit është lëshuar për 48 orë dhe nuk ka asnjë informacion se çfarë është bërë tutje me rastin e tyre.”Unë nuk jam ithtar i publiciteteve dhe lavdëratave , por nëse pyetni spektrin politikë e institucional në Viti dhe nëse pyetni shoqërinë civile dhe grupet e ndryshme të komuniteteve e shihni se gjatë gjithë punës sime mbi të gjitha ka dominuar angazhimi profesional e njerëzor” u shpreh Halili.

Ndërsa Elmina Mahmuti komandante rajonale e policisë në Gjilan tha për rajonipress se në rastin e pesë policëve të suspenduar në Viti janë duke u grumbulluar provat dhe dëshmitë të cilat pastaj i dorëzohen ose inspektoratit policor ose rasti kalon në standardet profesionale.

Edhe Mahmuti nuk e ka të qartë pse nuk është marrë ndonjë vendim. “Nuk e di pse nuk është vendos për rastin e tyre sepse edhe nëse kalohet rasti tek standardet profesionale atëherë aty vetëm mund të ketë ndonjë masë disiplinore dhe realisht ata mund të kthehen në vendet e tyre të punës” tha Mahmuti.

Ndërkohë në vend të Afrim Halilit si ushtrues detyre në stacionin policor në këtë qytet është dërguar Remzi Azemi sqaroj Mahmuti. /rajonipress/