Hajdari: Turizmi ndër sektorët më të goditur nga pandemia, tani rikuperimi i këtij sektori përbën mundësi të reja

Ministrja e Industrisë, Ndërmarrësisë dhe Tregtisë, Rozeta Hajdari ka thënë se së bashku me ambasadorin e Zvicrës, Thomas Kolly, kanë nënshkruar marrëveshjen për fazën e tretë të projektit Promovimi i Punësimit në Sektorin Privat (PPSE).

Sipas saj, projekti PPSE zbatohet nga organizata Swisscontact, ku për këtë ngjarje, ka takuar drejtorin rajonal për Evropën Juglindore, Martin Dietchi, me ekipin e tij të projektit PPSE dhe partnerë tjerë vendor.

“Turizmi në Kosovë është ndër sektorët më të goditur nga pandemia COVID 19, por tani në fazën pas pandemisë, rikuperimi i këtij sektori përbën mundësi të reja për rritje dhe punësim të mëtutjeshëm. Andaj, me përkushtim dhe punë, me kolegë dhe bashkëpunëtorë, jemi duke punuar në hartimin e politikave dhe përmirësimin e kornizës ligjore të industrisë dhe turizmit, në zhvillimin dhe promovimin e brendit të turizmit, si dhe në identifikimin e zonave dhe lokacioneve me përparësi të këtij sektori. Sukses dhe punë të mbarë ekipit zbatues të projektit PPSE, me përkrahjen dhe bashkëpunimin tonë me parimet e qeverisjes së mirë, për të siguruar arritjen e rezultateve te synuara, që do të kontribuojnë në zbatimin e strategjisë kombëtare të turizmit dhe rritjen e punësimit”, ka shkruar ajo.