Hahn: Jo dhunë në Kuvend

Komisionari i Bashkimit Evropian për Politikë të Fqinjësisë dhe Negociata për Zgjerim, Johannes Hahn, ka porositur deputetët e opozitës se dhuna nuk ka vend në sistemet demokratike të një shteti.

Në adresimin e tij para deputetëve të Kosovës, Hahn ka theksuar se duhet të respektohen institucionet e themeluara për të qeverisur në mënyrë demokratike. Sipas tij, rruga e Kosovës drejt integrimit në Bashkimin Evropian është e ndërlidhur ngushtë nga dialogu dhe zbatimi i marrëveshjeve me Serbinë.

Megjithatë, përfaqësuesit e subjekteve opozitare e kanë bërë të qartë se nuk do të heqin dorë nga bllokimi i punës së Kuvendit përderisa Qeveria e Kosovës nuk heq dorë nga zbatimi i Marrëveshjes për themelimin e Asociacionit të Komunave me shumicë serbe dhe i asaj për demarkacionin e kufirit me Malin e Zi.

Për më tepër në këtë seancë deputetët e “Vetëvendosjes” nxorën dy pankarta, në të cilat shkruante: “A është segregacioni etnik vlerë e BE-së?!” dhe “Marrëveshjet e padrejta nuk do të kalojnë!”. Në fjalimin e tij, komisionari Johannes Hahn ka thënë se duhet të ketë respekt për institucionet që sigurojnë qeverisje demokratike./zeri/