Hadërgjonaj refuzon Kosovën për Zvicrën

Florent Hadërgjonaj, mbrojtësi i skuadrës gjermane, Ingolstadt, nuk dëshiron të luajë për Kosovën.

Florent Hadërgjonaj, nuk do të luajë për përfaqësuesen e Kosovës. 22-vjeçari e ka njoftuar përzgjedhësin e Kosovës, Albert Bunjaki se nuk do t’i bashkohet Kosovës në katër ndeshjet e fundit eliminatore për kampionatin botëror “Rusia 2018”.

Por burime të Kohës Ditore të afërta me lojtarin, thonë se ai tashmë ka ndarë mendjen që të vazhdojë të luajë me Zvicrën dhe se nuk bëhet fjalë për t’iu bashkuar Kosovës pas këtyre katër ndeshjeve të mbetura eliminatore.

Kurse, Hadërgjonaj nuk ka pranuar të flasë për këtë temë. “Nuk dua të flas rreth kësaj teme. Bisedoni me menaxherin tim, Erdin Shaqiri”, ka thënë Hadërgjonaj.

Hadërgjonaj në qershor ka debutuar me ekipin e parë të Zvcrës në ndeshjen miqësore ndaj Bjellorusisë. Ai më herët ka veshur edhe fanellën e përfaqësueses U-20 dhe U-21 të Zvicrës. /Express/