Hadergjonaj: Jam i gatshëm ta ndihmoj Kosovën, luaj ku t’ma kërkon trajneri

Florent Hadergjonaj është i gatshëm të luajë në cilëndo pozitë në fushë që ia kërkon trajneri, në mënyrë që t’i ndihmojë Kosovës në përpjekjet e saj për t’u kualifikuar në Kampionatin Evropian 2020.

Në stërvitjen e së mërkurës pasdite, mbrojtësi i djathtë i Huddersfield Town në Championship, Hadergjonaj u përdor dhe u provua në krahun e majtë të mbrojtjes nga trajneri i Kosovës Bernard Challandes, raporton Gazeta Express.

Florent Hadergjonaj në duel me Vedat Muriqin gjatë stërvitjes të mërkurën para duelit me Çekinë të shtunën në Prishtinë. FOTO: FFK
Kjo për shkak se Kombëtares dardane i mungon mbrojtësi i majtë, Benjamin Kololli, shkaku i një lëndimi, në ndeshjet e 7 shtatorit kundër Republikës së Çekisë dhe më 10 shtator kundër Anglisë në Grupin a kualifikues.

25-vjeçari i lindur në Langlau – i cili debutoi më 10 qershor në fitoren historike të Kosovës 3:2 kundër Bullgarisë në Sofje – është mbrojtës i djathtë natyral, por thotë se nuk e ka problem të luajë edhe në krahun e majtë.

“Kam luajtur edhe në Gjermani e Angli si i majtë, megjithëse preferoj të luaj në krahun e djathtë. Mirëpo, nëse trajneri ma kërkon një gjë të tillë nuk është problem. Jam i gatshëm ta ndihmoj ekipin”, tha Hadergjonaj të mërkurën mbrëma në një konferencë për media në Prishtinë. /Gazeta Express/