Guda: Jam kandidat për drejtor, sistemi i shëndetësisë duhet të ndryshohet

Gjilan – Besim Guda aktualisht u.d. i drejtorit në spitalin e Gjilanit për rajonipress thotë se nuk ka ndikuar Imet Rrahmani në zgjedhjen e tij në këtë pozitë, por nuk e fsheh ambicien që të jetë kandidat serioz për drejtor. Guda thotë se spitali i Gjilanit ka kapacitete profesionale e kuadro të mira, vetëm se duhet të ngritet disiplina dhe përgjegjësia në punë.

Besim Guda erdhi në krye të spitalit të Gjilanit pas arrestimit të Abdylatif Latifit nga ana e policisë. Ky rast që ende po komentohet për mënyrën e arrestimit dhe shantazheve kriminale në drejtim të ish drejtorit, nuk e kanë penguar punën menaxheriale në spitalin e Gjilanit.

Përkundrazi Besim Guda ndihet keq me atë çfarë i ka ndodhur ish kolegut të tij. Guda thotë se edhe pse e ka shok të klasës Imet Rrahmanin, megjithatë nuk ishte personi ai që ndikojë që të sillet në krye të këtij institucioni. “Unë e di që pa mbështetjen politike është vështirë të menaxhosh me një institucion siç është spitali i Gjilanit. Do të mundohem maksimalisht që ta avancojë punën profesionale në këtë institucion shëndetësor” tha Guda.

Guda tha se do të bëjë përpjekje që puna e mjekut të jetë në qendër të vëmendjes, por edhe përgjegjësia e disiplina duhet të kërkohet prej tyre.”Unë kam marrë një përkrahje të madhe nga Curr Gjocaj edhe pse mendoj se sistemi i shëndetësisë duhet të ndryshohet. Ka shumë punë për të bërë, por mbi të gjitha unë insistojë që spitalin ta avancojmë edhe me trajnime e me punë profesionale e ekipore. Aktualisht barna kemi, ujë, rrymë e ngrohje gjithashtu kemi”.

Guda tha se ende nuk e ka të qartë pse nuk është shpallur konkursi për drejtor. “Unë sigurisht që do të jem njëri nga kandidatët për drejtor, vetëm se po pres që të shpallet konkursi nga Ministria e Shëndetësisë”./rajonipress/