Gruri i kontaminuar gati për t’u korrur

Gruri që dyshohet se mund të jetë kancerogjen i mbjellë në mes të deponisë së hirit në afërsi të termocentralit Kosova A, po rritet dhe është bërë gati për t’u korrë. Agjencia e Veterinës dhe Ushqimit (AUV) nuk ka arritur t’i marrë ende analizat përfundimtare të këtij gruri, përderisa ka marr vendim që të ndaloi përdorimin e tij deri në arritjen e analizave përfundimtare.

Ky institucion pranon se nuk lejohet që në tokat industriale të kultivohen drithërat. Gazeta ka raportuar se dy persona banorë të fshatit Dardhishtë të komunës së Obiliqit dhe të afërt me zyrtarë të Korporatës Energjetike të Kosovës, kanë mbjellë afro 15 hektar grurë në brendi të deponisë së hirit në afërsi të termocentralit Kosova A.

Përderisa AUV nuk ka arritur të nxjerrë analizat përfundimtare rreth këtij gruri, në shkresën e auditorit të KEK-ut të cilën e ka siguruar gazeta, shpjegohet se zona në vendin e quajtur, Fusha e palosjes së HIRIT, që shtrihet mes fshatit Orlloviq, Dardhishtë dhe Dragodan, pjesa përballë Drejtorisë së Divizionit për Prodhimin e Qymyrit, ku është bërë mbjellja e grurit është e kontaminuar. Kjo hapësirë thuhet se është uzurpuar dhe nuk është dhënë në shfrytëzim nga KEK-u.(Tribuna)