Greqia synon fitore ndaj Kosovës

Trajneri John vant Schip ndërkohë ka shprehur respekt për “Dardanët” para duelit të 14 nëntorit, i vlefshëm për kualifikimet e Botërorit 2022.

Kombëtarja greke synon ta mbyllë fazën e grupeve në kualifikimet e Botërorit 2022 në vendin e dytë.

E për ta arritur këtë, grekët synojnë t’i mposhtin Spanjën dhe Kosovën këtë muaj, shkruan “Gazeta Express”.

Trajneri John vant Schip ka shprehur respekt për “Dardanët” para duelit të tyre të 14 nëntorit në “Athens Olympic Stadium”.

Mirëpo, trajneri holandez insiston se grekët duhet t’i mposhtin gjithsesi Verdhekaltrit për ta ëndërruar kualifikimin në Botërorin e Katarit.

“Ndeshjet me Spanjën dhe Kosovën janë dy të fundit në fazën e grupeve. Do të luftojmë për mundësitë që i kemi për të përfunduar në vendin e dytë. Do ta përgatisim ekipin në mënyrën më të mirë të mundshme për duelet e mbetura. Duhet ta kemi në kokë faktin se Kosova nuk ka qenë kundërshtare e lehtë në tri përballjet tona. Për këtë, duhet të jemi në nivelet më të larta për të nxjerrë rezultat pozitiv”, deklaroi trajneri i lindur në Kanada.

Greqia aktualisht është e treta në Grupin B me 9 pikë, katër prapa vendit të dytë, Spanja dhe gjashtë prapa lideres Suedia.

Të dyja ndeshjet e këtij muaji, me spanjollët dhe kosovarët, grekët do t’i luajnë në shtëpi.

Nga ana tjetër, Kosova është e fundit në grup me 4 pikë. /Gazeta Express/