Gratë e PDK-së i japin mbështetje Nexhmedin Arifit

Viti – Pasdita e së enjtes ishte koha në të cilën gratë e Organizatës së Gruas Demokratike të Kosovës, dega në Viti, u mblodhën masovikisht për t`i dhënë mbështetje kandidatit për kryetar nga radhët e Partisë Demokratike të Kosovës, dega në Viti, zotit Nexhmedin Arifi dhe kandidateve gra për këshilltare komunale në Kuvendin Komunal të Vitisë. Ky takim shumë i madh është në vazhdën e takimeve që po i organizon Shtabi Zgjedhorë i PDK-së, dega në Viti, me të gjitha kategoritë shoqërore.

Këtë tubim të madh, i cili u mbajt në Restaurant Lindi, në Viti, e hapi Hanife Jonuzi e cila në fjalën e saj theksoi se Gruaja Demokratike e Kosovës, dega në Viti, e mbështetë fuqishëm kandidatin Arifi.

Sipas saj roli i gruas në procese politike nuk duhet të jetë vetëm dekorativ e standard që duhet plotësuar, por roli i gruas duhet të jetë çështje e të drejtave fundamentale njerëzore të garantuara me dispozitat bazë të sistemit juridiko pozitiv të Republikës së Kosovës.

Tubimin madhështorë e përshëndeti edhe Blerta Deliu- Kodra, deputete e Parlamentit të Republikës së Kosovës, sipas së cilës gruaja në PDK është e vlerësuar maksimalisht dhe se kjo qasje afirmative do të vazhdoi edhe më tutje.

Ajo në emër të Gruas Demokratike të Kosovës i dha mbështetje të pa rezervë kandidatit Arifi. Në fund këtë tubim e përshëndeti edhe kandidati për kryetar, Nexhmedin Arifi, i cili duke falënderuar gratë për mbështetjen e tyre, tha se do të jetë gjithmonë avokat i mbrojtjes dhe afirmimit të të drejtave gjinore.

Sipas tij në mandatin e ardhshëm gruaja, si kategori gjinore, do të ketë rol vendimmarrës në ekzekutivin dhe legjislativin e ardhshëm thuhet në njoftimin e sektorit për Informim pranë Shtabit Zgjedhorë të PDK-së, dega në Viti./rajonipress/