Gratë e komuniteteve në fokus të “Tetorit Rozë” në Kamenicë
RajoniPress
16:10, 29 Tetor, 2025
| 9 muaj më parë
Kamenicë – Në kuadër të Zbatimit të Planit Lokal të Veprimit për Avancimin e Komuniteteve Rome dhe Ashkali (2022-2026) dhe për shënimin e Tetorit Rozë, në Komunën e Kamenicës u mbajt një ligjëratë vetëdijësuese për gratë e komunitetit rom.
Ligjëratën e organizuan Koordinatorja e NJKDNJ-së, Nazmije Demolli Kastrati, së bashku me Zyrtaren për Barazi Gjinore, Kosovare Maroca Berisha, me mbështetjen e OSBE-së, përfaqësuar nga znj. Vjosa Emini.
Një numër i konsiderueshëm i grave morën pjesë, duke treguar interesim të veçantë dhe duke ndarë përvoja mbi kujdesin shëndetësor.
Me profesionalizëm dhe përkushtim, Dr. Eurona Hoda ua përcolli informacionet në mënyrë të thjeshtësuar dhe të kuptueshme, ndërsa Infermierja Sherife Veseli i informoi pjesëmarrëset se mamografia ofrohet në QKMF të Kamenicës dhe se çdo grua mbi 40-vjeç duhet të kryejë kontrollin, pasi kujdesi i hershëm është kyç për shëndetin.
Koordinatorja Demolli Kastrati falënderoi Dr. Hodën, Infermieren Veseli, OSBE-në, si dhe znj. Bahtije Kryeziu për bashkëpunimin dhe kontributin në këtë ligjëratë vetëdijësuese, e cila synon fuqizimin e grave dhe forcimin e solidaritetit ndërkomunitar./rajonipress/
