GP i PDK’së mbështet marrëveshjen PDK-LDK, Thaçi nuk pranon të flasë për ndarjen e posteve

Ka përfunduar takimi i grupit parlamentar të PDK’së.GP i PDK’së mbështet marrëveshjen PDK-LDK, Thaçi nuk pranon të flasë për ndarjen e posteve
Ka përfunduar takimi i grupit parlamentar të PDK’së.
Në këtë takim, kryetari i PDK’së, Hashim Thaçi, i ka njoftuar deputetët e tij për marrëveshjen me LDK’në.
Thaçi ka konfirmuar se Grupi Parlamentar i PDK’së i jep mbështetje të plotë këtij koalicioni.
“Grupi Parlamentar i PDK’së e mbështet fuqishme kësaj marrëveshjeje, kështu që tash do të vazhdojmë me hapat e mëtejmë të finalizimit të marrëveshjes. Kjo marrëveshje është e partive me vlera të përbashkëta, të qendrës së djathtë, me perspektivë për ndërtimin e institucioneve stabile, qeverisje të mirë, efikase, efektive, të luftës kundër korrupsionit e krimit të organizuar dhe e orientimit euroatlantik”, ka thënë Thaçi pas takimit.
Thaçi përsëri ka refuzuar të tregojë nëse është biseduar për ndarjen e posteve.
Ndërkohë, Express duke u thirrur në burime të veta, ka shpalosur ndarjen e posteve midis këtyre dy partive.
———————————————————
Përfundimtare: LDK merr Kryeministrinë – 8 Ministri PDK, 7 LDK, 4 minoritetet
Definitivisht, LDK do ta marrë Kryeministrinë. Ministri të reja nuk do të krijohen. PDK merr 8 Ministri, LDK 7 sosh, ndërkaq 4 ministri do t’i marrin minoritetet. Gazeta Express sjell edhe emrat e disa prej ministrave të rinj.
Partnerët e koalicionit të ri qeverisës, PDK dhe LDK, ende nuk kanë arritur ta finalizojnë marrëveshjen e arritur mes liderëve të dy partive natën e 19 nëntorit në Presidencë. Kjo edhe ka shtyrë krijimin e institucioneve edhe për një javë. Megjithatë, sipas burimeve të Gazetës Express, partitë janë marrë vesh për ndarjen e ministrive të mëdha, dhe ç’është më e rëndësishmja kanë rënë dakord për Kryeministrinë.
Një zyrtar i lartë, i përfshirë në grupet për harmonizim programesh, i tha gazetës se, përveç Kryeministrisë, LDK do të marrë edhe Ministrinë e Financave dhe atë të Shëndetësisë. PDK, ndërkaq, do ta mbajë edhe më tutje Ministrinë e Arsimit dhe atë të Punëve të Brendshme.
I njëjti burim ka saktësuar se Avdullah Hoti, Nënkryetari i dikurshëm i Komunës së Prishtinës, do të emërohet Ministër i Financave nga LDK, kurse Nënkryetarja aktuale e LDK’së, Teuta Sahatçiu shkon në Ministrinë e Shëndetësisë.
“Nga PDK dihet që Ministër i ri do të jetë Bekim Çollaku, deri tash Shef i Stafit të Kryeministrit”, ka thënë burim i Gazetës Express.
“Çollaku do të jetë Ministër i Integrimeve”, ka saktësuar ai.
Post ministror do të marrin edhe Skënder Hyseni i LDK’së, Bajram Geci – po ashtu. Burimi i Express përmend edhe deputetin Arben Gashin në “listën ministrave të LDK’së”.
Ministria e FSK’së, sipas gjitha gjasave, do t’i mbetet PDK’së.
“Si zakonisht, nëse kjo Ministri i mbetet PDK’së, z. Agim Çeku do të jetë Ministër”.
Minoritetet edhe më tutje do të mbajnë Ministrinë e Kthimit dhe atë të Mirëqenies Sociale.
“Ministria e Pushtetit Lokal ka mundësi që i jepet partnerëve nga minoritete jo-serbe”, tha burimi i gazetës.
Për Ministrinë e Bujqësisë përmendet Margarita Kadriu, Nënkryetarja aktuale e PDK’së.
Blerand Stavileci dhe Memli Krasnqi, sipas gjitha gjasave, do të jenë në “vijën e parë të frontit” – në Parlament.
“Z. Blerand Stavileci është i pesti në listën e pritjes për deputetë. Sipas rregullores, ata që bëhen ministra, japin dorëheqje prej deputetit. Kështu që z. Stevileci do të jetë i pranishëm në legjislaturën aktuale, për herë të parë”.
Gjatë dy viteve të ardhshme, po në Parlament do të jetë edhe Kryetari i PDK’së, Hashim Thaçi.
“Z. Thaçi mbetet në Parlament, me shpresën se pas dy vitesh shkon në Presidencë”, tha një zyrtar i PDK’së në kushte anonimiteti për Express.
Në Qeveri, ndërkaq, mbetet dy prej njerëzve të afërt të tij, Hajredin Kuçi e Enver Hoxhaj.
“Posti i Zëvendëskryeministrit do të ndahet mes tyre”, tha ai.
Ndërkohë, zyrtarisht zyrtarët e asnjërës parti nuk kanë dashur të flasin për ndarjen e ministrive, e as për emrat e ministrave të rinj.