Goli i Sadikut, goli i muajit

Berat Sadiku ka shkëlqyer të hënën mbrëma, kur i realizoi dy gola për Thunin në duel me kampionin e ri të Zvicrës, Baselin, për të cilin luajnë Shkëlzen Gashi, Taulant Xhaka dhe Arlind e Albian Ajeti.

Takimi mes tyre ka përfunduar baras, 2:2. Por, goli i dytë i Sadikut po vlerësohet nga mediet zvicerane si më i bukuri i shënuar në muajin maj në shtetin helvetik, përcjell Zëri.

Shqiptari me pasaportë finlandeze atë gol e realizoi me një gjysmëvolej, prej jashtë 16-metërshit të Baselit, me një gjuajtje të fortë, duke e dërguar topin në këndin e lartë të portës, me ndihmën e transversales.

Në anën tjetër, një gol për Baselin e ka realizuar sulmuesi më efikas i dy edicioneve të fundit në Zvicër, Shkëlzen Gashi, i cili po kërkohet nga një numër i madh i klubeve evropiane. /Zëri/