Goditja e krimit synohet më ndryshime kodesh

Këshilli Gjyqësor i Kosovës nuk ka bërë ndonjë kërkesë të veçantë sa i përket plotësim-ndryshimit të legjislacionit penal, pavarësisht se shumë institucione kanë vërtetuar mangësi në Kodin Penal dhe në atë të Procedurës Penale – tre vjet pasi ato kanë hyrë në fuqi.

Megjithatë, ky institucion ka marrë propozime nga të gjitha gjykatat, nisur nga ajo Supreme, pastaj Gjykata Apelit dhe ajo Themelore.

Aishe Qorraj, nga zyra për Informim e KGjK-së, ka konfirmuar pranimin e propozimeve të gjykatave për plotësimin dhe ndryshimin e Kodit Penal dhe Kodit të Procedurës Penale, duke thënë se të njëjtat më pas ia kanë përcjellë Ministrisë së Drejtësisë.

Edhe në Ministrinë e Drejtësisë pohojnë se kanë marrë komente jo vetëm nga KGjK-ja, por edhe nga institucionet tjera zbatuese të ligjit në vend, megjithëse nuk sqarojnë se cilat janë ato institucione dhe çka konkretisht kanë kërkuar nga ministria që udhëhiqet nga Dhurata Hoxha.
/Gazeta Tribuna/