Gjyshi dhe gjyshja

Poezi nga Xhemë Karadaku

Moti, diku në një pallat,
Një gjysh dhe një gjyshe
Pasdite zhvilluan debat,
Por e bënë më ndryshe!

Gjyshen përlan një trill,
Nis e flet plot me satirë,
I thotë gjyshit: Bandill!
Tërë ditën – në pasqyrë.

Kot kujton se je djalosh
Të ka rënë bora n’flokë
Ndale veten o mjekrosh
Mos fluturo-ec përtokë!

E, gjyshi ia ktheu pastaj,
Me ironi, si bandill i keq:
-Çapkëne, pse je në vaj?
Nga zemra nuk të heq…!

Nëse aty nuk t’rrihet ty,
Shprehe mendimin lirë
Dil e merre botën në sy
Ndoshta gjen më mirë?!

Si një Këshill Përqafimi,
Nipi edhe mbesa, thonë,
Një Marrëveshje Pajtimi
E arritën përgjithmonë!.