Gjyqtari i futbollit Valbon Hoxha me asistentët e tij shkëlqejnë në Francë

Gjyqtari i futbollit, Valbon Hoxha nga Cërnica e Gjilanit me asistentët e tij Zgjim Rahimi e Faton Jakupi poashtu nga Gjilani, kanë shkëlqyer në ndarjen e drejtësisë në fushën e futbollit.

Gjyqtari Hoxha me hapa të sigurt po i hap shtigjet në arenën ndërkombëtare, ndërsa këtë zeje fisnike të futbollit e ka të trashëguar nga babai i tij Malazog Hoxha, i cili konsiderohet si ish-njëri ndër gjyqtarët më të mirë në futbollin Kosovar.

Hoxha si 17 vjeçar ka filluar të ndaj drejtësinë me talentin që ka, në vitin e kaluar ka filluar të ndaj drejtësinë në Ligën e Parë të Kosovës dhe brenda 4 vitesh është duke ndërtuar një karrierë tejet të suksesshme.

Gjyqtari 21 vjeçar, Valbon Hoxha së bashku me asistentët e tij ka ndarë drejtësinë në turneun më të madh të futbollit në Francë, “Paris world Games”. Ky turne i madh i futbollit është mbajtur 7 ditë rresht, nga 7.7 2018 gjerë më 13.7.2018.

Me paraqitjet e tyre në 5 ndeshje sa kanë ndarë drejtësinë kanë lënë përshtypje tejet të mira, duke dëshmuar se Hoxha më shokët e tij ka një ardhmëri të mirë në karrierën e tij.

Hoxha ka bërë të ditur se në cilat ndeshje ka ndarë drejtësinë.
“Gjatë 7 ditëve kemi referuar në 5 ndeshje, një në grup moshën 17 vjeç dhe 4 ndeshje tjera të grup moshave 19 vjeç, ne kemi pasur rastin të ndajmë drejtësinë në çerekfinale dhe gjysmëfinale”.

Hoxha thekson se janë vëzhguar nga shumë shtete evropiane dhe gjyqtar ndërkombëtar.
” Jemi vëzhguar nga shumë vëzhgues ndërkombëtar nga Gjermania, Skocia, Anglia e Franca, ndërsa jemi vëzhguar nga ish-gjyqtari ndërkombëtar Michel Vautrot, i cili ka gjykuar finalen e kampionatit europian Holandë-Unioni Sovjetik si dhe gjysmëfinalen e kampionatit Botëror dhe shumë ndeshje të mëdha ndërkombëtare, nën vëzhgimin e gjyqtareve më nam Europian e Botëror ishim edhe nga gjyqtari
Anglez, David Coote”.

Talenti i madh në ndarjen e drejtësisë në fushën e futbollit, Valbon Hoxha, thekson se në fund të turneut vëzhguesit e këtyre ndeshjeve në raportet e tyre kanë lavdëruar punën e tyre.
” Vëzhguesit e ndeshjeve, pas ndeshjeve në raportet e tyre në ndarjen e drejtësisë nga ana jonë kanë qenë shumë pozitive, kjo dëshmon nga 130 gjyqtar nga 30 vende të botës, asistenti Faton Jakupi fitoi çmimin si asistenti më i mirë i turneut”, ka thënë Hoxha.

Gjyqtari Hoxha ka edhe një falënderim të veçantë drejtuar FFK-së dhe kryetarit të Gjyqtareve të Kosovës, Përparim Hasani.
“Federata na ka përkrahur në çdo hap dhe i falënderohemi nga zemra gjithashtu edhe kryetarit të gjyqëtarve të Kosovës, Përparim Hasanit për mbështetjen e vazhdueshme në aspektin profesional, ndërsa një falënderim i veçantë shkon për Presidentin e turneut Daniele Curcio, i cili ka bërë çdo gjë që ne të jemi si në shtëpinë tonë”.

Nuk ka dyshim se futbollit Kosovar, po i vijnë gjyqtar që shumë shpejt do të prekin arenën ndërkombëtare./rajonipress/