Gjykata e Gjilanit vendos ekstradimin e Baki Sadikit

Gjilan – Gjykata e Qarkut në Gjilan vendosi për ekstradimin e narko-bosit Baki Sadiki në Sllovaki. Gjykata e Qarkut në Gjilan të hënën ka vendosur për pranimin e kërkesës për ekstradimin e narko-bosit Baki Sadikut në Sllovaki, i arrestuar javë më parë në rajonin e Gjilanit tha për rajonipress Zyhdi Haziri.

Trupi gjykues i kryesuar nga Zyhdi Haziri, Hasan Sadiku e Rasim Rasimi ka vendosur ta ekstradoj në Sllovaki pasiqë Baki Sadiki nuk është shtetas i Kosovës pasi i njëjti ka dështuar ta vërtetojë këtë pranë gjykatës.

Baki Sadiki është dënuar në mungesë nga një gjykatë sllovake me 22 dy vjet burg për veprën e importimit, shpërndarjes dhe shitjes së lëndëve narkotike (heroinë).

Të dhënat e gjykatës thonë se, sipas autoriteteve sllovake, Baki Sadiki ishte pjesëtar i një organizate kriminale e cila merrej me importimin e heroinës nga Turqia në Europën Perëndimore. Prokuroria sllovake në këtë rast ka arritur të vërtetojë që i pandehuri kishte importuar në Sllovaki së paku 6 herë kontingjente atletesh të mbushura me heroinë.

Vendimi i gjykatës pritet të procedohet në Gjykatën Supreme të Kosovës ndërsa lejen për ekstradim duhet ta nënshkruaj vetë Ministri i Drejtësisë së Republikës së Kosovës tha Haziri. /rajonipress/