Gjobat ndaj biznesit rriten 284 për qind

Bizneset në Kosovës janë vënë në shënjestër të inspektoreve të Administratës Tatimore të Kosovës (ATK), ndaj të cilav po aplikohen gjoba të larta.

Gjatë nëntëmujorit të këtij viti, ATK-ja ka rritur të hyrat nga gjobat ndaj bizneseve për 284 për qind, krahasuar me periudhën e njëjtë të vitit të kaluar.

Sipas nëntëmujorit të këtij viti të publikuar para pak ditësh nga Ministra e Financave (MF), shihet se gjatë vitit 2012 në emër të gjobave, ATK-ja ka inkasuar 1 milion e 398 mijë e 158 euro, derisa në periudhën e njëjtë të vitit të kaluar në emër të gjobave, ATK-ja ka grumbulluar 364 mijë e 240 euro.

Derisa ATK-ja shihet se ka rritur të hyrat nga gjobat për 284 për qind, në anën tjetër ky institucion ka pasur shumë më pak të hyra sa i përket tatimit në fitim, ku gjatë këtij viti të hyrat janë 95 për qind më të vogla se sa vitin e kaluar.

Sipas të dhënave të MF-së, gjatë këtij viti, ATK-ja në emër të tatimit në fitim ka mbledhur 84898 euro, derisa në periudhën e njëjtë të vitit të kaluar, ATK-ja ka arritur të mbledhë hiç më pak se 1 milion e 791 mijë e 203 euro.

Në anën tjetër, përfaqësues të bizneseve në vend, thonë se rritja e të hyrave nga gjobat për 284 për qind është shqetësuese. Sipas tyre, përmes gjobitjes së bizneseve, ATK-ja po mundohet ta arrijë planin e vet sa u përket të hyrave të planifikuara vjetore.

Berat Rukiqi, sekretar i Odës Ekonomike të Kosovës (OEK), thotë se ATK-ja për të arritur rezultat e veta, po i dëmton në masë të madhe bizneset, duke iu shqiptuar gjoba, nganjëherë edhe pa arsye. Sipas tij, një veprim i tillë i ATK-së ka prodhuar vetëm efekte negative, si për ATK-në, ashtu edhe për biznesin. “Duke parë bizneset një trajtim të tillë nga ana e ATK-së, ata po mundohen dhe po gjejnë mënyrë për bërë biznes, duke i ikur tatimit. Rritja e gjobave nga ana e ATK-së në mënyrë automatike e rrit evazionin fiskal në vendin tonë. Këto veprime të ATK-së duhet të shikohen mirë”, tha ai, shkruan “Zeri”.

Edhe Agim Shahini, kryetar i Aleancës Kosovare të Bizneseve, thotë se rritja e gjobave po e pengon në masë të madhe zhvillimin e bizneseve, por edhe ndikon në rritjen e evazionit fiskal në vendin tonë. Shahini thotë se ATK-ja në mënyrë të vazhdueshme duhet ta edukojë e jo ta dënojë biznesin në Kosovë. “Rritja e gjobave prodhon efekt negativ te biznesi, pasi që në momentin kur ato gjobiten për një gjë shumë të vogël, atëherë ato shikojnë mundësi për të punuar në të zezë e jo për t’u përmirësuar. Edukimi është forma më e mirë për të zhvilluar biznesin dhe për të eliminuar evazionin fiskal”, tha ai.

Gjatë periudhës janar-shtator 2012, Administrata Tatimore e Kosovës ka grumbulluar mbi 203 milionë euro, krahas planit për grumbullimin e të hyrave dëri në fund të vitit prej 287.8 milionë euro.Sipas Ministrisë së Financave, pranimet nga ATK-ja në nëntëmujorin e vitit 2012 janë më të larta për 5 për qind, krahasuar me periudhën e njëjtë të vitit të kaluar.