Gjimshiti: Liverpooli shumë i fortë për ne, ndaj Interit rikthehemi

Atalanta ka pësuar humbje të thellë në kuadër të xhiros së tretë në Ligën e Kampionëve.

Skuadra simpatike italiane u mposht në shtëpi me rezultat të thellë 0-5 nga gjiganti anglez Liverpool.

E në këtë takim ka qenë i pranishëm në fushë si gjithmonë edhe mbrojtësi shqiptar Berat Gjimshiti.

Qendërmbrojtësi i Atalantës ka thënë se Liverpooli ishte shumë i fortë për skuadrën e tij.

“Liverpooli ishte shumë i fortë për ne, por nuk ia bëmë edhe aq të vështirë. Ne nuk luajtëm mirë në të gjithë aspektet, me shumë gabime individuale”.

“Kështu, humbet ndaj skuadrave të tilla. Ishim gati dhe të motivuar, më pas shkuam në disavantazh dhe ndoshta humbëm ekuilibrin”, ka thënë Gjimshiti.

Tutje mbrojtësi shqiptar tha se skuadra synon të rikthehet te rezultatet pozitive në fundjavë ku presin Interin.

“Duhet të shohim përpara me patjetër, nuk do të jetë e lehtë për ta bërë. Do të shikojmë gabimet e bëra, do të na ndihmojnë, pastaj do të provojmë të harrojmë humbjen dhe të shikojmë përpara se është një sfidë shumë e rëndësishme”, u shpreh Gjimshiti. /Telegrafi/