Gjilani shkëlqen ndaj Lirisë

Skuadra e Gjilanit ka shënuar fitore me rezultat 4:0 ndaj Lirisë, në ndeshjen e zhvilluar të shtunën në stadiumin “Përparim Thaçi” në Prizren, e që i takoi xhiros së 16-të të elitës së futbollit të Kosovës.

Gjilani kaloi në epërsi që në minutën e 24-të. Melos Zenunaj shkaktoi penallti në zonë dhe mori karton të verdhë, ndërsa nga 11-të metra, i pagabueshëm ishte Edi Basha, që shënoi për 1:0.

Mbrojtësi Zenunaj një minutë më pas, gaboi në posedim të topit dhe shkaktoi faull duke ndalur në mënyrë të palejuar një futbollist të Gjilanit.

E mori kartonin e dytë të verdhë dhe u përjashtua nga loja.

Nga gjuajtja e lirë për Gjilanin shënoi Elvedin Heriq, në minutën e 26-të.

Heriq ishte i saktë me gjuajtje të fuqishme pas gjysmë ore lojë për 3:0.

Në pjesën e dytë, Gjilani që kishte edhe epërsinë numerike në fushë dhe epërsinë e thellë në rezultat, e administroi mirë lojën dhe nuk lejoi befasi.

Madje e shënoi edhe golin e katërt me zëvendësuesin Elton Cale, pesë minuta para fundit.

Me fitoren e shënuar të shtunën, Gjilani pas 15 ndeshjeve tani ka 17 pikë, ndërsa në javën e ardhshme si vendas do ta zhvilloje derbin e qytetit ndaj Dritës.