Gjilani shënon Ditën Ndërkombëtare të Familjes, theksohet roli i gruas dhe forcimi i vlerave familjare

Gjilan – Në kuadër të shënimit të 15 Majit – Ditës Ndërkombëtare të Familjes, Njësia për të Drejtat e Njeriut në bashkëpunim me Qendrën për Punë Sociale në Komunën e Gjilanit organizoi një takim diskutues kushtuar rolit dhe rëndësisë së familjes në shoqëri, sfidave bashkëkohore me të cilat ajo përballet, si dhe pozitës së gruas në jetën familjare dhe shoqërore.

Gjatë aktivitetit u vlerësua se familja mbetet shtylla themelore e shoqërisë, vendi ku kultivohen vlerat njerëzore, edukimi, solidariteti dhe mbështetja reciproke. Pjesëmarrësit diskutuan për sfidat sociale, ekonomike dhe kulturore që ndikojnë në mirëqenien familjare, duke theksuar nevojën për fuqizimin e rolit të gruas dhe krijimin e një ambienti të sigurt, të barabartë dhe gjithëpërfshirës për të gjithë anëtarët e familjes.

Në fokus të diskutimeve ishte edhe rëndësia e bashkëpunimit ndërinstitucional në hartimin dhe zbatimin e politikave sociale që synojnë mbrojtjen e të drejtave të njeriut, përkrahjen e familjeve dhe avancimin e pozitës së gruas në shoqëri. U theksua se institucionet lokale dhe qendrore kanë rol kyç në krijimin e mekanizmave mbështetës dhe ofrimin e mundësive të barabarta për qytetarët.

Organizatorët vlerësuan se aktivitete të tilla ndikojnë në promovimin e vlerave familjare, respektit, mirëkuptimit dhe bashkëpunimit, si elemente të domosdoshme për ndërtimin e një shoqërie më të shëndetshme dhe më të qëndrueshme./rajonipress/