Gjilani nuk e harron figurën dhe krijimtarinë kolosale të Beqir Musliut

Gjilan – Të shtunën krijues, gazetarë, familjar e kanë përkujtuar Beqir Musliun me rastin e 71 vjetorit të lindjes dhe 20 vjetorit të vdekjes. I tërë ky përkujtim që i bëhet Beqir Musliut tregon se Gjilani, Anamorava dhe Kosova nuk e harrojnë për asnjë moment figurën e ndritur e kolosale të Beqir Musliut.

Krijues nga treva të ndryshme të Kosovës e trojeve shqiptare të shtunën u mblodhën bashkë për të nisur Trekëndëshin poetik që sivjet i kushtohet Beqir Musliut.

Ishin këta krijues që manifestimin e nisën pikërisht me nderimin që i bënë tek varri Beqir Musliut.

Sabit Rrustemi në cilësinë e organizatorit të “Ars Club Beqir Musliu” tha se këtë vit i tërë manifestimi “Trekëndëshi i Karadakut” i kushtohet Beqir Musliut. “Ne po e nderojmë dhe respektojmë Beqir Musliun, sepse ai me veprat e tij dhe me krijimtarinë e tij aq të pasur e ka nderuar Gjilanin, Anamoravën e tërë Kosovën” tha Rrustemi.

Ndryshe poetë nga Kosova, Maqedonia, Kosova Lindore e Shqipëria, kësaj radhe, nga ky trekëndësh kufitar, i përkushtohen emrit dhe veprës së shkrimtarit gjilanas, Beqir Musliut, në 20 vjetorin e vdekjes, duke përuruar librin studimor të Yrjet Berishës ( tashmë i ndjerë): “Poetika e Beqir Musliut” i botuar këto ditë përmes shtëpisë botuese “Beqir Musliu”.

Nehas Sopaj, ( Universiteti i Shkupit ) do flas për librin si dhe krijimtarinë letrare të Beqir Musliut, ndërsa do deklamohen edhe poezi nga opusi i poetik i Beqir Musliut nga ana e aktorit gjilanas Ramadan Kurti si dhe Xhezide Selimit e Adem Ajvazi.

Ndryshe, shkrimtari Beqir Musliu ka lindur më 11 qershor të vitit 1945 dhe ka vdekur më 24 qershor 1996. Ai është prezantuar thuaja në të gjitha antologjitë e shkrimtarëve shqiptarë të kohës së tij e më vonë. Punimet e tij janë përkthyer në gjuhën frënge, angleze, spanjolle, italiane, arabe, gjermane, hungareze, rumune, turke, sllovake, maqedonase, sllovene, serbe dhe kroate./rajonipress/