Gjilani nis ushtrimin “Reagimi i Përbashkët 2016”

Gjilan – Drejtoria për Mbrojtje dhe Shpëtim e Komunës së Gjilanit, në bashkëpunim me Forcën e Sigurisë së Kosovës ka filluar ushtrimin fushor “Reagimi i Përbashkët 2016”, i cili po mbahet nga data 27 – 30 qershor.

Kjo Drejtori, si pjesë e ushtrimit, është duke ju përshtatur skenarit të ushtrimit të hartuar nga FSK dhe Planit Kontingjent.

“Kapacitetet e Drejtorisë, ku përfshihen zyrtaret dhe stafi ndihmës, i cili sipas “Planit kontingjent për përballimin e mundshëm të refugjatëve” dhe me “Planin operativ emergjent” janë pjesë Qendrës Operative Emergjente, e cila menaxhon situatën. Pjesëmarrësit e angazhuar janë edhe nga Policia e Kosovës, Kryqi Kuq, SHZSH, Drejtoria e Shëndetësisë – Qendra Kryesore e Mjekësisë Familjare”, ka deklaruar drejtori për Mbrojtje dhe Shpëtim, Ensar Kadriu.

Ai ka informuar se Qendra Operative Emergjente edhe sot ka koordinuar operacionet në terren, duke ngritur postkomandën e incidentit në fshatin Pogragjë, e cila ka menaxhuar simulimin me rreth 300 refugjatë, ku është bërë evidentimi, trajtimi ushqimor dhe shëndetësor, si dhe transportimi i tyre në qendrën kryesore të strehimit në palestrën e sporteve në Gjilan.

Gjatë zhvillimit të operacioneve Qendrën Operative Emergjente e kanë vizituar njësitë monitoruese të KFOR- it amerikan, gjerman dhe turk të shoqëruar nga pjesëtarët e FSK – së. Ushtrimi vazhdon edhe në ditët në vijim sipas planifikimit./rajonipress/