Gjilani nis mësimin online edhe në çerdhe e institucione parashkollore

Gjilan – Komuna e Gjilanit nga dje ka filluar mësimin online edhe për fëmijët në çerdhe, kopshte e institucione parashkollore.

Kryetari i Gjilanit, Lutfi Haziri, e ka vlerësuar lartë këtë proces mësimor edhe këtë nivel shkollor, pas atij fillor dhe të mesëm, i cili ka filluar me 16 mars, duke qenë komuna e parë në nivel vendi.

“Jam jashtëzakonisht i lumtur me ekipin që po punon në organizimin e mësimit në programe arsimore obligative në këtë kohë pandemie. Po ashtu, në këtë gjendje të emergjencës po e vazhdon me sukses ta shfaq kalendarin kulturor edhe Teatri i Gjilanit, sikurse edhe shkolla e artit pamor “Adem Kastrati”, e cila po i realizon ekspozitat në formë online”, ka thënë Haziri.

Ai potencoi se Komuna e Gjilani po punon me aktivitete online në ofrimin e shërbimeve përmes komunikimit e takimeve online, që mund të ndikojnë në familje, në lagje e komunitet, për ta thyer këtë kohë pandemie me programe të ndryshme./rajonipress/