Gjilani mposhtet nga Llapi në ndeshjen e tensionuar

Në një ndeshje të tensionuar dhe dramatike, skuadra e Gjilanit ka pësuar humbje nga Llapi me rezultat 2:1.

Ndeshja e zhvilluar në Podujevë u tensionua sidomos në fundin e ndeshjes, pas disa vendimeve të gjyqtarit kryesor të ndeshjes.

Të parët në epërsi kaluan vendësit. Ahmed Januzi shënoi për 1:0 me asistim të Ergyn Ahmetit. Gjilani arriti të barazoi rezultatin në minutën e 71-të.

Sulmuesi Senad Jaroviq i barazoi shifrat në minutën e 71-të, pasi ishte i saktë nga penalltia. Më vonë, gjyqtari Shala dha përsëri penallti, por tani për Llapin.

Muhamet Hyseni gaboi nga penalltia e parë në minutën e 88-të, pasi Aridon Bllaca e priti gjuajtjen e tij.

Por, penalltia u përsërit, pasi Bllaca nuk ishte në vijën e portës, ndërsa lojtarë të Gjilanit ishin brenda në zonë pa u gjuajtur penalltia.

Në tentimin e dytë të minutës së 90-të, Hyseni ishte i saktë dhe e shënoi golin e 18-të të edicionit. Ky rast solli shume protesta nga skuadra e Gjilanit.

Pas kësaj humbje, Gjilani vazhdon luftën për mbijetesë, ku ka 22 pikë në vendin e tetë.