Gjilani merr tri pikë në “Zahir Pajaziti” në Podujevë
RajoniPress
18:37, 23 Shtator, 2020
Në javën e dytë të Superligës së Kosovës në futboll, skuadra e Gjilanit pas humbjes së thellë në javën e parë nga Feronikeli, sot në stadiumin “Zahir Pajaziti”, ka arritur ta mposht Llapin me rezultat minimal 0-1.
Në fillim të ndeshjes është mbajtur një minutë heshtje në nder të ish-Presidentit të Gjilanit, Shukri Sylejmani i cili sot ka ndërruar jetë.
Në pjesën e parë kryesisht u zhvillua ndeshje në gjysmë fushat e kundërshtarëve pa raste shënimi, duke mos pasur punë portierët Enea Koliqi i Gjilanit e Nava i Llapit.
Në minutën e 51-të, mbrojtësi Haliti shkakton penallti, ndërsa futbollisti i Gjilanit Fiton Hajdari nuk ishte i saktë nga pika e bardhë duke lëshuar rast tejet të volitshëm.
Dhjetë minuta më vonë në minutën e 62-të, Progni depërton nga ana e djathtë pason bukur gjerë te Darko Nikaq i cili nuk e pati vështirë ta mposht portierin Nava të Llapit.
Në minutën e 68-të, përforcimi i shumë i pritur i Gjilanit, Besar Musolli, inkuadrohet për herë të parë duke mbrojtur ngjyrat “kuqebardhë”.
Në javën e tretë të dielën në Gjilan zhvillohet derbi i javës në mes Gjilanit e Ballkanit të Suharekës./rajonipress/
