Gjilani me vështirësi mposhtë Feronikelin

Gjilan – Në javën e XI-të, të Superligës së Kosovës në futboll në stadiumin e qytetit në Gjilan, skuadra e Gjilanit ka arritur me mund të madh ta mposhtë Feronikelin e Drenasit me rezultat minimal 1-0. Gjatë 90 minutave futbollistët e Gjilanit kishin pak më tepër nga loja por nuk ishin të rrezikshëm drejt portës së portierit mysafirë Smakiqit.

Rastin më të mirë në pjesën e parë e kishte Krasniqi i cili ishte vetëm para portës së Smakiqit por ky i fundit shpëton portën e tij. Tifozët “Skifterat” në minutën e 20-të, kanë hedhur mjete piroteknike si shenjë proteste për tifozin e tyre Engjëll Smërqaku ku kërkohet drejtësi për zbardhjen e vrasjes së tij.

Në minutën e 27-të, Albert Dabiqaj shënon gol, por i refuzohet me ndihmën e VAR-it pasiqë ishte pozitë jashtë loje ku njeherit në këtë aksion dhe lëndohet.

Golin e fitores Gjilani e shënon në minutën e 64-të, autor ishte Blerim Krasniqi njeherit ishte edhe goli i parë në Superligë duke i siguruar skuadrës së tij tri pike. Pas ndeshjes trajneri i Gjilanit, Ismet Munishi, deklaroi. “Kjo ishte ndeshja më e mirë që ka luajtur Gjilani këtë sezon. Kishim angazhim të madh dhe vetëbesim të plotë. Goli i shënuar nga Blerim Krasniqi më gëzon shumë, pasi ka dhënë kontribut të madh për klubin deri tani. Goli i shënuar ishte i bukur dhe gjithçka shkoi mirë. I patëm disa mungesa sikurse Musolli, Kastrati, Prekazi e Veliu, por duhet të vazhdojmë tutje”.

Gjilani pas 11 ndeshjeve ka tubuar 20 pikë, ndërsa në javën e XII-të, Gjilani takohet me Dukagjini në Klinë./rajonipress/