Gjilani me formacion të përgjysmuar nuk arrin ta mposht Flamurtarin

Gjilan – Ndeshja në mes Gjilanit dhe Flamurtarit e cila u zhvillua në stadiumin e qytetit në Gjilan, në pranin e rreth 400 shikuesve, ka përmbyll javën e 23 të Superligës duke mos dhënë fitues në këtë takim, ndeshje e cila u mbyll me rezultat të bardh 0-0.

Futbollistët e Gjilanit këtij takimi ju qasën të hendikepuar pa Rusin, Haxhimusë, Kaqiun e Hajdinin ndërsa këtyre ju bashkua nga minuta e 30-të edhe Fisnik Papuqi i cili u lëndua, ndërsa futbollistët e Flamurtarit gjatë tërë 90 minutave arritën të mbrohen duke sjell në kryeqytet një pikë të madhe të mbijetesës.

Florent Papuqi nga goditja nga këndi në minutën e 17-të, godet horizontalen e portierit mysafir Kushtrim Mushicës.

Në pjesën e parë Isa Eminhaziri në minutën 32 e 42, në dy rastet i vetmuar gjuan plogësht pranë portës mysafire.

Futbollistët e Flamurtarit rastin më ideal të ndeshjes e patën në minutën e 52-të, Oskar Vicente Mendes ka mundur të shënon pas gabimit të Bekteshit i cili gjendet përball portierit Kenan Haxhihamza por gjuajtja e tij përfundon jashtë portës.

Gjilanasit kanë mundur të shënojnë në minutën e 60-të, por gjuajtjen e Hysenit, Mushica mbron duke shpëtuar portën e tij.

Pas ndeshjes trajneri i Flamurtarit, Gajur Rexhepi, ishte i kënaqur me një pikë.
“I falënderoj futbollistët e mijë për angazhimin e tyre dhe për pikën e fituar, është kjo një pikë shumë e madhe në këto momente për skuadrën tonë”.

Ndërsa trajneri i Gjilanit, Arbnor Morina, theksoi.
“Nuk i konkretizuam rastet të cilat i patëm, futbollistët u angazhuan dhanë gjithçka nga vetja por nuk arritëm të shënojmë, nuk e kemi prit këtë rezultat por ky është futbolli, ne nuk do të ndalemi do të kërkojmë rezultate pozitive në çdo ndeshje ndërsa po e përsëris për të satën herë edhe vet presidenti i klubit është i kënaqur me angazhimin e të gjithëve në klub”.

Në javën e 24-të, Gjilani do të takohet me Besën në Pejë./rajonipress/