Futbollistët e Gjilanit në stadiumin “Fadil Vokrri” në Prishtinë, kanë zhvilluar ndeshjen e barazhit me skuadrën e Besës së Pejës duke e mposhtur me rezultat 1-0.
Në një lojë tejet të dobët pa aksione të qarta, futbollistët e Gjilanit ishin më të mirë se skuadra e Besës, e cila poashtu ishte një skuadër pa koncept të lojës, ndërsa arbitri kësaj ndeshje Tefik Maloku nga Podujeva së bashku me ndihmësit e tij ishin akterët më të dobët të kësaj ndeshje tejet të rëndësishme.
Futbollistët mysafirë gjatë 90 minutave vetëm në minutën e 7-të, nëpërmjet Sheqerollit kanë rrezikuar por Haxhihamza i Gjilanit intervenon duke shpëtuar portën e tij.
“Kuq e bardhët” e Gjilanit ne të vetmin aksion të pjesës së parë e shndërrojnë në gol.
Në minutën e 24-të, Lopez pason një diagonale drejt Keita Razak e ky me mjeshtri arrin ta parabollon portierin Haxhijaj, duke qenë edhe goli vendimtar në këtë ndeshje.
Në minutën e 70-të, Fiton Hajdari i Gjilanit shënon gol të rregullt por për çudi arbitri anësor sinjalizon për pozitë jashtloje.
Në minutën e 77-të, Kushtrim Shabani gjuan furishëm edhe pse i papenguar nga askush gjuan drejt në duart e portierit Haxhijaj.
Në minutat shtesë në atë 93-të, Perez i vetmuar nga 6-7 metra gjuan jashtë portës.
Trajneri, Gentjan Mezani, pas ndeshjes ka deklaruar.
“Është dashur gjatë kampionatit të rregullt t`i kryejmë detyrat tona por ashtu nuk ndodhi, ndeshjet e barazhit janë me stres dhe të rrezikshme por ja arritëm qëllimin, shpresoj se në edicionin e ardhshëm do të kemi një projekt serioz me drejtuesit e klubit ndërsa unë do të jem edhe për një vit në stolin e Gjilanit”.
Pas ndeshjes edhe kapiteni i “kuq e bardhëve”, Ylber Kastrati, deklaroi.
“Nuk e kemi merituar të jemi në barazh, me rëndësi ja arritëm qëllimin edhe pse ishte mjaft vështirë por u pa se kualiteti ishte në anën tonë ndërsa i falënderoj tifozët “Skifterat” për mbështetjen që na kanë dhënë gjerë në këtë moment”./rajonipress/
