Gjilan – Në këto muajt e fundit, brenda qytetit, në Gjilan u prenë shumë e shumë drunjë. Nga kjo duket qartë që Gjilani si në të gjitha punët, edhe në ndërtimin dhe zhvillimin e rrugëve nuk ka ndonjë plan. Edhe te rrugët punët zhvillohen ashtu pa lidhje thotë Kushtrim Kadriu nga lëvizja “Vatra”.
Reagimi i plotë
Para disa viteve u mbollën ato drunjë, dhe tamam sa u rritën dhe filluan të marrin formë, e t’i japin sadopak freskinë e shumë munguar qytetit dhe qytetarëve, dalin komunarët e nderuar dhe i largojnë.
A e shohin zyrtarët e ambientit se në çfarë tmerri është katandisur ajri në qytet? A e dinë që komuna jonë është e dyta më e ndotura në nivel vendi dhe njëra prej komunave më të ndotura në krejt kontinentin e Evropës?
Në vend se komuna ta bëjë obligative që para çdo shtëpie të mbillen nga dy drunjë, këta burrat e botës dalin e i presin edhe ata që janë.
Në vend që të ruhet dhe të shtohet gjelbërimi, këta ngritën e i presin drunjtë dhe turren pas asfaltit thuhet ne reagim./rajonipress/
