Gjilani ja shuan ëndrrat Feronikelit për titull

Gjilan – Skuadra e Gjilanit në ballafaqim me kampionin aktual të Kosovës në futboll Feronikelin, ka zhvilluar ndeshjen më të mirë për gjatë 28 javëve në Vala Superligën e Kosovës duke e mposhtur me rezultat 1-0.

Me këtë humbje skuadra nga Drenasi ka humbur të gjitha gjasat që të përsërit suksesin e vitit të kaluar duke u shpallur kampion.

“Bardh e kuqët” e Gjilanit nëpërmjet kapitenit të saj Zgjim Mustafës, kanë mundur shumë lehtë të kalojnë në epërsi por gjuajtjen e tij e ndali ish portieri i Gjilanit, Faton Maloku.

Pesë minuta më vonë rast ideal për Ergon Hysenin por gjuajtja e tij me kokë shkon për disa centimetra jashtë pingules së Malokut.

Në minutën e 17-të, mbrojtësi Armend Thaqi i Gjilanit pasi kalon dy mbrojtës të skuadrës mysafire gjuan por jashtë portës.

Futbollistët mysafirë gjatë pjesës së parë nuk e patën asnjë rast për të rrezikuar portën e portierit të Gjilanit, Donat Kaciut.

Me të filluar pjesa e dytë pas një kundërzbritje në minutën e 48-të, Haxhimusa bukur shërben Gëzim Rusin i cili depërton dhe nga 14 metra mposht Malokun.

Futbollistët mysafirë rastet më ideale për të shënuar i patën në minutën e 58-të kur Bardhi gjuan afër pingules dhe atë në minutën e 67 kur Shabani nga ndërprerja rrezikon, por Kaciu ishte i vëmendshëm.

Në minutën e 90-të, Rusi ka mundur të shënon edhe golin e tij të dytë por dështon me kokë nga 4 metra gjuan mbi portë.

Trajneri i Gjilanit, Arbnor Morina, pas ndeshjes deklaroi : “Djemtë dhanë të gjithë mundin e tyre, unë i përgëzoj për këtë fitore dhe deri në fund të sezonit do të luajmë të krijojmë sa më shumë pikë”.

Ndërsa trajneri i Feronikelit, Afrim Tovërlani, i zhgënjyer deklaroi.
“Futbollistët e Gjilanit gjatë gjithë ndeshjes bën zhagitje të lojës, ata patën një rast dhe atë e shfrytëzuan ndërsa tani për pozitën e dytë do të jetë beteja shumë interesant”.

Ndeshjen me autoritet e gjykoi gjyqtari nga Prishtina, Burim Jahmurati, në praninë e 600 shikuesve./rajonipress/