Gjilani importon një pikë nga Podujeva

Gjilan – Futbollistët e Gjilanit javën e tretë në Superligën e Kosovës në futboll, ishin mysafire e liderit aktual Llapit, të cilët ndan pikët me rezultat 1-1.

Në stadiumin “Zahir Pajaziti”, mbi 2000 shikues u ndanë të kënaqur me atë se çka dhanë dy skuadrat gjatë 90 minutave.

Pjesa e parë kryesisht u zhvillua në gjysmëfushë, dy skuadrat patën nga një rast shënimi.
Së pari Karahoda në minutën e 40-të gjuan nga 16 metra afër portës së portierit Ademi, ndërsa pesë minuta më vonë Gentrit Begolli nga tri metra dështon për ta mposhtur portierin e Gjilanit, Kaciun.

Me të filluar pjesa e dytë në minutën e 47-të, kapiteni Namani harkon bukur duke e gjetur bashkëlojtarin e tij Mirand Maksutin i cili nga afërsia tund rrjetën e portierit të Gjilanit, Kaciu, duke sjell skuadrën e tij në epërsi 1-0.

Futbollistët e Gjilanit golin e barazimit e arritën në minutën e 71-të, Betim Haxhimusa pasi pranon një top nga thellësia me lehtësi kalon një mbrojtës të Llapit i cili nga 10 metra tund rrjetën e Ademit.

Gjyqtari i këtij ballafaqimi ishte Besfort Kosumi i cili ndeshjen e drejtoi me autoritet.

Pas ndeshjes trajneri i Gjilanit, Arbnor Morina theksoi.
“Barazimi i kësaj ndeshje është real por edhe dy skuadrat kanë mundur të dalin me nga tri pikë, por t’ju theksuar se skuadra e Gjilanit për momentin luan futbollin më të mirë në Superligë”.

Homologu i Morinës, Tahir Batatina pas ndeshjes theksoi.
“Skuadra ime meritoi tri pikë kishim më tepër nga loja por skuadra e Gjilanit është një skuadër e cila duhet respektuar, dhe në këtë
ballafaqim u tregua e matur”.

Në javën e 4-të, skuadra e Gjilanit është nikoqire e Vllaznimit të Gjakovës./rajonipress/