Gjilani fillon t`i mbush “akumulatorët” për stinorin pranveror

Gjilan – Ashtu siç e kishte paraparë në planprogramin e tij, trajneri Arbnor Morina me futbollistët e tij që nga sot kanë filluar stërvitjet që stinorin pranveror ta presin sa më të përgatitur.

Në takimin e parë teknikut të Gjilanit, Morinës, ju paraqitën të gjithë futbollistët të cilët i ka në dispozicion. Ndërsa risi tek “bardh e kuqët” e Gjilanit është futbollisti Fuat Karabeg, i cili erdhi nga Vllaznia e Pozheranit.

Siç mësohet “bardh e kuqët” e Gjilanit janë në negociata me disa futbollist cilësor dhe pritet shumë shpejt të bëhet zyrtarizimi i tyre.
Tekniku i Gjilanit, Arbnor Morina, lidhur me tubimin e parë të futbollistëve ka deklaruar.
“Ashtu siç e kemi parashikuar që nga sot ne kemi ndezur bateritë si asnjëherë më parë, do të jenë në fillim stërvitjet pak të mundimshme por shumica e futbollistëve vazhdimisht në mënyra të ndryshme kanë mbajtur anën fizike të përgatitur, është një ndihmesë shumë e madhe pasi koha është e mirë, futbollistët ju kanë qasur stërvitjeve në mënyrë shumë serioze ndërsa ne do të qëndrojmë në Gjilan gjerë kah fundi i Janarit, e pastaj do të jemi në ndonjë vend bregdetar”.

Skuadra e Gjilanit nga 18 javë të zhvilluara është në pozitën e 8 me 26 pikë të tubuara, duke shënuar 5 fitore 11 barazime dhe 2 humbje./rajonipress/