Gjilani festiv

Gjilan – Për dy ditët e festës Gjilani nuk ka festuar vetëm .Pos shoqërive dhe ansambleve vendëse në Festivalin e këngëve dhe valleve “Gurra popullore” kanë marrë pjesë ansamble e shoqëri nga Tirana, Tetova, Ferizaji, Vitia, Podujeva, Kumanova, Obiliqi etj.

Qyteti i Gjilanit e ka nisur ditën e saj të festës për nder të çlirimit me një program shumë të përzgjedhur artistik. Gjilanasit pos zbukurimit të qytetit të tyre kanë pasur mundësi që të jenë pjesë e programeve të larmishme kulturore artistike për dy ditë radhazi.

Tashmë i pari i Komunës Qemajl Mustafa ka dhënë mesazhin e tij për të festuar në mënyrë dinjitoze dhe ka përkujtuar gjilanasit se pikërisht më 15 qershor të vitit 1999, UÇK-ja dhe NATO-ja hynë në qytetin e Gjilanit, për t`i dhënë fund përgjithmonë okupimit serb. “Në këto 14 vite rrugëtim në liri, kemi arritur të ndërtojmë vendin dhe të përmirësojmë mirëqenien e qytetarëve tanë, të të gjithëve pa dallim, por ende kemi shumë punë për të bërë në zhvillimin ekonomik dhe avancimin e demokracisë” ka thënë Mustafa.

Për ditën e çlirimit kanë uruar edhe Rexhep Kadriu i AAK-së, Zenun Pajaziti i PDK-së, Lutfi Haziri nga LDK-ja, Omer Daku nga AKR-ja, Jashar Ramadani nga LDD-ja si dhe shumë parti tjera e shoqata që veprojnë në Gjilan.

Ndryshe për të qenë festa më e pasur Veton Nevzati nga drejtoria e kulturës tha se kanë përzgjedhur një program të pasur për qytetarët gjilanas. Ndërkaq i tërë ky program po përcillet nën përkujdesur përgjegjësit e festivalit Nazim Gagica dhe këshilli artistik i udhëhequr nga Izet Kallaba e Shaban Shabani.

Nazim Gagica tha se Gjilani feston ditën e çlirimit me një program të pasur. Sipas tij në natën e parë janë paraqitur me programet e tyre AKV “Gurra”, “Albafolk”, “Bajram Shabani” nga Kumanova, AKV “Kemajl Azizi nga Vitia, AKV “Xhavit Haziri” nga Obiliqi, AKV “Josip Rela” nga Podujeva.

Kurse të shtunën me programet e tyre pritet të paraqiten AKV “Gjilani”, AKV “Lungjeria” nga Gjirokastra, AKV “Agimi” nga Prizreni, AKV “Kastriotët” nga Ferizaj, AKV “Xheladin Zeqiri” nga Tetova dhe AKV “Kamëza” nga Tirana./rajonipress/

Shpërndaje.
© RAJONIPRESS