Gjilani edhe njëherë ndëshkohet nga pushteti qendror

Nga Gëzim Rrustemi – Që nga paslufta Gjilani asnjëherë nuk pati një trajtim fer nga asnjë prej qeverive tona, që nga e para deri te e fundit. U la anash si mos më keq, sikur të mos ishte fare pjesë e Kosovës. Përpos që u anashkalua, komuna jonë u përdorë edhe si hambar i madh votash duke u gënjyer vit pas viti e zgjedhje pas zgjedhjeje përmes premtimeve të rrejshme.

Sikur të mos mjaftonin tërë këto, komuna jonë edhe u ndëshkua dhe po ndëshkohet në vazhdimësi nga pushteti qendror, siç është rasti i ndërprerjes së autostradës Prishtinë- Dheu i Bardhë, pastaj vënia në orë policore e komunës tonë edhe për faktin se kishte fare pak raste me covid 19, gjë e cila çoi në mbylljen e të gjitha bizneseve të vogla dhe tërë shërbimeve të gastronomisë duke e dërguar komunën tonë buzë falimentimit. Mos ta harrojmë edhe anulimin e impiantit të ujërave të zeza, e shumë e shumë të tjera. Shtroj pyetjen: Qeveria e Kosovës (prej asaj të parës deri te kjo e fundit) a e konsideron edhe Gjilanin si pjesë të Kosovës?

Nëse po, atëherë çka nuk është në rregull? A keni ndonjë urrejtje ndaj nesh apo po e keqpërdorni faktin që ne gjilanasit kemi qëlluar të kulturuar dhe nuk bëjmë telashe. Sido që të jetë, nuk keni faj ju. Fajin e ka qytetari i Gjilanit që i jep votë ” t’hunit e t’konopit”, fajin e ka qytetari i Anamoravës që s’e bëri dot partinë e vet, por turret pas partisë së “Drenicës”, “Dukagjinit”, “Llapit” e “Llaushës”, parti të cilat i sollën Gjilanit vetëm të këqija dhe asnjë të mirë, i sollën vetëm telashe, vuajtje, varfëri, zhgënjim e zbrazje. Andaj ju them: zgjohuni o ju politikanë të anamoravës, zgjohuni o ju votues.

Zgjohuni e kërkoni përgjegjësi prej politikanëve dhe prej partive! Zgjohuni se shkuam poshtë! Zgjohuni se edhe ashtu jemi vonë shumë!

Gëzim Rrustemi Lëvizja Qytetare Vatra

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).