Gjilani e Saranda mund të bashkëpunojnë në shumë fusha

Gjilan – Një delegacion nga komuna e Gjilanit i kryesuar nga Arben Dubova, Ismet Hajdini, Blerton Ajeti, dhe Naser Sylejmani po qëndron në Sarandë të Shqipërisë. Ata të premten janë pritur nga kryetari i bashkisë së Sarandës Stefan Çipa ku u diskutua për mundësinë e ngritjes së bashkëpunimit në mes të komunës së Gjilanit dhe bashkisë së Sarandës.

Gjithashtu në këtë pritje tejet miqësore të cilën e organizoi Çipa për delegacionin e Gjilanit, u diskutua edhe lidhur me formalizimin e marrëveshjes për binjakëzimin e dy komunave, gjegjësisht aktin e nënshkrimit të kësaj marrëveshje nga ana e dy kryetarëve, Qemajl Mustafa dhe Stefan Çipa.

Kryetari i Sarandës i njoftoi mysafirët se asambleja bashkiake (këshilli bashkiak) i Sarandës e ka miratuar aktin e vëllazërimit të bashkisë së Sarandës me komunën e Gjilanit dhe shprehi gatishmërinë që me komunën e Gjilanit të ketë bashkëpunim të ngushtë në të gjitha sferat.

Delegacioni nga Gjilani gjithashtu vizitoi edhe departamentet- drejtoritë e bashkisë së Sarandës si atë të zhvillimit ekonomik, urbanizmit, personelit, gjendjen civile, kadastrit, etj, prej nga u njoh nga afër lidhur me organizimin e punës dhe disa nga aktivitetet që zhvillohen në ato departamente-drejtori.

Mbetet obligim i komunës së Gjilanit që të propozojë datën dhe vendin e aktit të nënshkrimit të marrëveshjes për binjakëzim në mes të dy kryetarëve dhe me këtë rast delegacioni nga komuna e Gjilanit u zotua se këtë çështje do ta diskutoj me kryetarin z. Qemajl Mustafa dhe do ta përcaktojnë së shpejti datën, e cila orientimisht pritet të jetë kah gjysma e dytë e Gushtit ose fillimi i Shtatorit.

Delegacioni nga Gjilani gjithashtu vizitoi edhe disa institucione kulturore dhe historike të bashkisë së Sarandës./rajonipress/