Gjilani e fiton në tavolinë ndeshjen me Vitinë

Komisioni i Garave e ka miratuar ankesën e Gjilanit për ndeshjen e javës së 12-të të Ligës së parë, kundër Vitisë me të cilën ka luajtur baras 1:1 dhe të njëjtën e ka regjistruar me rezultat zyrtar 3:0, në të mirë të ekipit gjilanas.

Kjo është bërë për shkak se personi i cili e ka kryer punën e mjekut- fizioterapeutit te Vitia, Qamil Ajeti nuk e ka kualifikimin e duhur dhe kjo i ka kushtuar Vitisë me humbjen e ndeshjes. Komisioni ka hapur procedurën disiplinore ndaj KF Vitia, ndaj Qamil Ajetit i prezantuar si mjek- fizioterapeut i skuadrës, por edhe ndaj vëzhguesit Xhafer Dobra i cili ka lejuar që ky person ta kryej punën për të cilën nuk është i kualifikuar.

Komisioni ka caktuar edhe orarin e ri të ndeshjeve të këtij stinori për Syperligën e Kosovës. Java e 15-të zhvillohet me 10/11 nëntor, java e 16-të zhvillohet të mërkurën me 14 nëntor, kurse java e fundit e 17-ta zhvillohet më 17/18 nëntor në ora 13:00. Orari është përshpejtuar për shkak të kërkesë së disa klubeve por edhe pjesëmarrjes së Prishtinës e Trepçës ’89 në turneun mbarëkombëtarë në Shqipëri.(zeri)