Gjilani bën një hap mbrapa larg titullit të kampionit, barazon kundër Malishevës

Në stadiumin “Liman Gega”, skuadra e Gjilanit e cila po lufton për titull të kampionit ka ndarë pikët me rezultat të bardh 0-0 me Malishevën, e cila me këtë pikë ka ikur nga zona e rrezikshme e tabelës, ndërsa Gjilani me këtë barazim bën edhe një hap mbrapa drejt titullit të Kampionit të cilin po e kërkon për herë të parë në historikun e saj. Gjilani pas eliminimit nga garat për Kupën e Kosovës, alternativë tjetër në këtë edicion të garave nuk ka përpos të ndjek titullin e kampionit, por me lojën të cilën treguan futbollistë të Gjilanit janë larg këtij qëllimi.

Në këtë përballje dy skuadrat kanë pasur rastet e tyre për shënim, por portierët e dy skuadrave Gashi e Koliqi nuk lejuan që të tunden rrjetat e tyre.

Trajneri i Gjilanit, Ismet Munishi, pas 90 minutave ka theksuar se me këtë orar të ngjeshur të ndeshjeve as në Premier League nuk ka. “Sigurisht që do ta vazhdojmë luftën për titull kampioni. Ky është kampionat shumë i vështirë, dhe në fund do të dhurojë kualitet. Është kampionat që kush do ta meritojë do të shpallet kampion. Jo si kampionatet e tjera me bonbone e karamele”.

Në javën e 27, Gjilani pret liderin Ballkanin kjo ndeshje konsiderohet njëra ndër më të vlefshmet për dy skuadrat gjatë tërë këtij kampionati./rajonipress/