Gjilanasit në mënyrë madhështore e falin Fitër Bajramin

Gjilan – Manifestimi qendror i faljes së Fitër Bajramit është zhvilluar në qendër të qytetit. Mijëra besimtarë kanë kryer ritualin fetar duke uruar njëri tjetrin për një ditë paqësore e vëllazërore mes njëri tjetrit. Mesazhi i kryetarit të Bashkësisë Islame në Gjilan, Sulejman Osmanit ishte që kjo ditë të shfrytëzohet për të nderuar njëri tjetrin, për të ndihmuar e për të qenë më solidar me të varfëritë.

Qendra e qytetit ishte e vogël për të zënë tërë atë lum të njerëzve që kishin mësyrë për të falur në ambient të hapur faljen e Fitër Bajramit. Ndryshe ky është viti i dytë që falja e Fitër Bajramit bëhet në ambient të hapur në platon e madhe të teatrit të qytetit në Gjilan.

I pranishëm në faljen e Fitër Bajramit ishin edhe dy kandidatët për kryetar të Gjilanit Lutfi Haziri dhe Rexhep Kadriu.

Ndërkaq fjalimin kryesor e ka mbajtur Sulejman Osmani kryetar i Bashkësisë Islame në Gjilan i cili ka thënë se Ramazani është muaj i veçantë për të gjithë besimtarët kudo në botë. “Në këtë ditë të madhe thërrasim për unitet, solidaritet, mirëqenie e prosperitet njerëzor. Sot duhet të flisni me njëri tjetrin, të jeni më human, më vëllazëror dhe më të përkushtuar ndaj miqve e familjarëve tuaj” tha Osmani.

Manifestimi qendror ka përfunduar pa asnjë ekces./rajonipress/