Gjilanasi Liridon Ramadani certifikohet ambasador i paqes

Gjilan – Një grup i të rinjve nga Kosova, Serbia dhe Bosnje Hercegovina morën pjesë në seminarin e organizuar nga OJQ “Youth Education Committee” i cili u mbajt në Beograd, prej datës 7-12 dhjetor 2014. Liridon Ramadani u shpreh se ka përfituar një eksperiencë të mirë në Beograd. Ndërmjet të rinjve u krijua një klimë e bashkëpunimit dhe socializimit të plotë duke shkëmbyer përvojat tona dhe shprehur dëshirën dhe vullnetin e fortë që të bashkëpunojmë edhe në të ardhmen përmes projekteve apo vizitave të ndryshme tha ai.

Projekti i quajtur “Ambasadorët e Rinj të Pajtimit” i mbështetur nga Ambasada e Mbretërisë së Bashkuar në Beograd, kishte për qëllim takimin e të rinjve dhe diskutimin e përvojave të shoqërive nga këto shtete në procesin e tranzicionit dhe pajtimin e regjionit duke i shfrytëzuar integrimet evropiane si një mekanizëm ndihmës, raporton rajonipress.

Regjionin e Gjilanit në këtë konferencë e përfaqësoi Liridon Ramadani ekonomist i diplomuar dhe njëherit absolvent në Fakultetin e Edukimit në UP.

Si pjesë të kulturës së Gjilanit ai prezantoi edhe derbin gjilanas në futboll Drita – Gjilani, por edhe disa produkte tjera vendore për t’u njohur më mirë secili pjesëmarrës me kulturën e njeri – tjetrit.

Ramadani tha për rajonipress se gjatë tërë kësaj periudhe kanë patur takime të ndryshme me përfaqësues të lartë shtetëror nga Serbia si Borko Stefanoviç me të cilin u diskutua edhe për dialogun Kosovë – Serbi, përfaqësues nga mediat serbe si me gazetaren e TV Pink Olja Beckoviç e cila ligjëroi për liritë e medias dhe manipulimet e mediave në kohën e regjimit të Sllobodan Millosheviçit.

“Nga tërë ajo që tha zonja Beckoviç le të kuptohet se sa kishte ndikim pushteti mbi mediat në Serbi. Pjesë e diskutimeve ishin edhe krimet e luftës në regjion, gjenocidi në BIH dhe shpallja e pavarësisë së Kosovës më 2008, ligjëratë e përgatitur nga Janja Simentiç profesoreshë në Fakultetin e Shkencave Politike në Universitetin e Beogradit. Pikë e përbashkët e gjithë pjesëmarrësve ishte integrimi në Bashkimin Evropian” ka sqaruar Ramadani.

Ramadani tha se organizatori kishte paraparë disa takime me njerëz kompetent për këtë proces si Pierre Mirel prej të cilit u kuptua se sa rrugë e gjatë është deri te integrimi i plotë në EU.

Pastaj Marina Rakiç, Naim Leo Beçiri dhe një mikpritje e ngrohtë nga përfaqësuesi i EU-së në Serbi Michael Davenport me të cilin u diskutua për politikën e EU-së në lidhje me zgjerimin dhe futjen nën ombrellën e saj edhe shtetet e Ballkanit Perëndimor.

Pjesë e takimeve të shumta ishte edhe diskutimi me ambasadorin e Kosovës në Beograd Valdet Sadikun, i cili foli për bashkëpunimin dhe rrugën që është hapur pas negociatave me Serbinë.

Ai gjithashtu foli edhe për praktikat e mira ndërkufitare dhe rritjen e vazhdueshme të eksportit nga Kosova në Serbi. “Pra, ideja e këtij seminari ishte sigurimi i një qasjeje krejtësisht tjetër duke ju referuar të ardhmes së përbashkët, pra, integrimi në EU duke kapërcyer kështu konfliktet e së kaluarës”.

Ramadani u shpreh se ka përfituar një eksperiencë të mirë në Beograd. “Ndërmjet të rinjve u krijua një klimë e bashkëpunimit dhe socializimit të plotë duke shkëmbyer përvojat tona dhe shprehur dëshirën dhe vullnetin e fortë që të bashkëpunojmë edhe në të ardhmen përmes projekteve apo vizitave të ndryshme”.

Ndryshe seminari ka përfunduar më 12 dhjetor të këtij viti ku ata u certifikuan si ambasador të pajtimit dhe tani ata janë duke shkëmbyer përvojën e fituar në Beograd me të rinjtë në vendet e tyre./rajonipress/