‘Gjiganti’ Kryeziu tregon si flitet shqip në Superligën zvicerane

Mirlind Kryeziu është i gjatë 1.98 centimetra dhe shihet si futbollist me të ardhme të ndritur. Ai në bisedë me albinfo.ch flet për fëmijërinë e tij, dashurinë për futbollin dhe si flitet shqip në Superligën zvicerane.

Është vetëm 21-vjeçar, por i gjatë 1.98 centimetra. Ka luajtur për Zvicrën U-16, U-17, U-18, U-19 dhe U-20, ndërsa tani ka vendosur të luajë për Kosovën. Mirlind Kryeziu në një intervistë ekskluzive për albinfo.ch, tregon për jetën në Zvicër, dashurinë për futbollin dhe shokët e tij që luajnë në skuadrat e tjera zvicerane.

“Nëna ime ka ardhur pak më herët se babai im në Zvicër, ndërsa gjyshi ka punuar si sezioner në Zvicër. Babai im ka ardhur si azilkërkues në vitin 1992. Isha nipi i parë nga ana e nënës. Kështu m’i plotësuan të gjitha dëshirat. Dashuria për futbollin ka filluar herët. Kam jetuar në një lagje të Cyrihut me shumë shqiptarë, ku kemi luajtur së bashku futboll”, është shprehur Mirlind Kryeziu për albinfo.ch.

Superliga e Zvicrës, me shumë shqiptarë

Zvicra është e mbushur me futbollistë shqiptarë. “Në Zvicër ka shumë futbollistë shqiptarë dhe kemi respekt për njëri-tjetrin. E kam më mirë me Benjamin Kolollin dhe Hekuran Kryeziun, sepse jemi në një ekip. Por, edhe me Albian Ajetin jemi në kontakt”, është shprehur tutje futbollisti i Zurichut, që ka një të ardhme të ndritur para tij. Ai luan si qendërmbrojtës. “Ishte një vendim i lehtë për t’iu bashkuar Kosovës. E falënderoj Zvicrën për kushtet që mi ka ofruar deri më tani dhe shkollën e futbollit. Isha kapiten i Zvicrës për grupmoshat e reja për tre vjet. Kam biseduar me familjen dhe e kemi marrë një vendim së bashku, që të luaj për Kosovën”, thekson tutje mbrojtësi gjigant.

“Me Hekuranin dhe Benjaminin flasim shqip në fushë dhe në zhveshtore. Shpresoj se do të debutoj me Kosovën në stadiumin ‘Fadil Vokrri’. Megjithatë, t’ia lëmë kohës”, ka përfunduan Mirlind Kryeziu.

Qendërmbrojtës për FC Zürich

Mirlind Kryeziu ka lindur në Zvicër dhe është 21-vjeçar. Ai luan si qendërmbrojtës dhe shihet si lojtar me të ardhme të ndritur

Ka luajtur për Zvicrën

Kryeziu ka luajtur për Zvicrën U-16, U-17, U-18, U-19 dhe U-20, ndërsa tani luan për Kosovën. Ai ishte ftuar për dy ndeshjet ndaj Maltës dhe Azerbajxhanit, por nuk debutoi.

https://www.albinfo.ch/gjiganti-kryeziu-tregon-si-flitet-shqip-ne-superligen-zvicerane/