Gjermania merr Bunjakin

Mesfushori kosovar Enis Bunjaki, hyri në histori të Përfaqësueses së Kosovës, si lojtari më i ri që luajti ndeshje miqësore. Anëtari i ekipit të famshëm gjerman Eintracht Frankfurt luajti me vetëm 16 vite, dhe kjo bëri që të ngjalleshin shumë polemika, por përsëri trajneri i Përfaqësueses Albert Bunjaku, e aktivizoi atë duke besuar fuqishëm në talentin që kishe.

E jo vetëm numri një i Kosovës, por edhe Federata e Futbollit të Gjermanisë, ka besuar dhe po beson jashtëzakonisht shumë në Enisin. Së fundmi djaloshi nga Kaçaniku ka marrë ftesë nga Kombëtarja kampione e Botës, Gjermania dhe tani e tutje do të aktivizohet me grupmoshat U18. Në një prononcim për Arenën, Enisi tregon se si erdhi deri tek ftesa e Gjermanisë, si dhe a do të mund më t’i bashkohet vendlindjes së tij.

“Pas paraqitjeve të mira që kam pasur, ka ardhur edhe ftesa e Kombëtares së Gjermanisë U18. Pasi jam konsultuar me familjen time dhe me trajnerin Albert Bunjaku, kam pranuar që të luaj për Gjermanin dhe tani javën tjetër do ta bëjë debutimin tim”, u shpreh fillimisht talenti 16-vjeçar, duke shtuar se ai do të luaj përsëri për Kosovën. “Natyrisht që do të luaj përsëri për vendin tim. Unë jam kosovar dhe nuk e harroj lehtë vendlindjen. Sa herë që të më bëhet ftesa do të jem në gjendje për ta ndihmuar”, vazhdoi tutje Bunjaki…(Arena).