Gjenevë : UPSH, me rastin e fitimit të çmimit të Frankofonisë, organizon pritje të ngrohtë për miqtë e saj të shumtë

Kohë më parë Grupi i Ambasadorëve frankofon, i akredituar në Bernë të Zvicrës, ka nderuar me çmimin e më të mirit Universitetin Popullor Shqiptar të Gjenevës. Vlera këtij çmimi i shtohet edhe më tepër kur dihet se në konkurrencë ishe dhe Salloni Ndërkombëtar i librit në Gjenevë, i cili është nga më të njohurit në botë, menjëherë pas atij të Frankfurtit në Gjermani.

Ky sukses i jashtëzakonshëm u shënua me një solemniteti të madh, ku merrnin pjesë personalitete të shquara të Parlamentit të Zvicrës, dhe të kantonit të Gjenevës. Në këtë ceremoni i pranishëm ishte edhe Ambasadori Fuqiplotë i Vietnamit, i shoqëruar nga bashkëpunëtorët e tij. Ai u paraqit edhe me një fjalë rasti, ku përgëzoi UPSH-në për këtë arritje të lartë. Pastaj mysafirëve që kishin mbushur përplot amfiteatrin iu drejtua edhe zoti Manuel Tornare, president i këtij institucioni. Ai tha se ky sukses të gjithëve na bënë krenar, sepse është rezultat i një pune të shkëlqyer ekipore.

Natyrisht që barra kryesore në organizimin e aktiviteteve i ka rënë drejtoreshës Albana Krasniqi-Malaj, e cila çdoherë tregohet e përpiktë në punën e saj. Por, ky organizim si fryt ka edhe këtë çmim të rëndësishëm ç’do të na motivojë edhe për suksese të tjera tha Tornare.

Fjala iu dha edhe z. Ueli Leuenberger, mik i dëshmuar i komunitetit shqiptar dhe themelues i këtij Universiteti. Ai, tha se nuk mund të fsheh gëzimin e tij për këtë arritje të jashtëzakonshme.

Ndërkaq zoti Pierre Maudet, Ministër i Punëve të Brendshme i kantonit të Gjenevës, i njohur si bashkëpunues me të gjitha komunitetet dhe vlerësues i kulturave të tyre, me fjalë të përzgjedhura përgëzon integrimin e shqiptarëve në institucionet e Zvicrës, posaçërisht në ato të Gjenevës.

Ai thotë: ”Nga kontaktet e mia të drejtpërdrejta me shqiptarët, e veçanërisht me ata të lindur dhe të arsimuar në Zvicër, kam vërejtur integrim të mirëfillët, i cili bënë që ata mos të dallohen me hiçgjë, nga ne që jemi këtu dembabadem.

Në mesin e diplomatëve të shumtë dhe të personaliteteve të tjera ishin edhe Ambasadori i Shqipërisë në Bernë z.Ilir Gjoni, si dhe Konsulli i Përgjithshëm i Kosovës në Gjenevë z.Ramadan Avdiu, gjithëashtu edhe Ambasadori i Maqedonisë.

Të pranishmit me interpretim të shkëlqyer këngësh në shqip dhe frëngjisht i argëtoi Elina Duni,e cila tanimë është e njohur në të gjitha vendet e Evropës Perëndimore. Atë me ekzekutimin brilant në violinë e plotësoi edhe z.Edmon Basha i cili kënaqi dhe relaksoi mbi dyqind pjesëmarrës të këtij manifestimi.

Në fund Albana Krasniqi-Malaj, drejtoreshë e UPSH-së falënderoi të gjithë për kontributin dhe ndihmën e dhënë. Me ç’rast më të merituarve në shenjë mirënjohje për punën u ndau dhe buqeta lulesh. Edhe kësaj radhe u ruajt tradita e mikpritjes si një nga vlerat tona më të çmuara, ku secili pati mundësinë e shijimit të shumëllojshmërinë së ushqimeve, të përgatitura enkas për këtë ngjarje të rëndësishme kulturore. Në ndarje të gjithë patën përshtypjen se ishte një ceremoni e organizuar mirë dhe mjaft mbresëlënëse./Albswiss.com/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).