Gjenerali Mekenz konfirmon mbështetjen e SHBA-ve për FSK-në

Ministri i Ministrisë për Forcën e Sigurisë së Kosovës, Haki Demolli dhe komandanti i FSK-së gjenerallejtënant Rrahman Rama pas takimeve të shumta që patën në shtetin e Ajovës së SHBA-ve, sot kanë vazhduar vizitën e tyre në Vashington. Ministri dhe Komandanti i FSK-së në Vashington Fillimisht kanë bërë homazhe në ‘Varrin e ushtarit të panjohur’.

“Komandanti i FSK-së gjenerallejtënant Rrahman Rama ka pasur takim me gjenerallejtënant Keneth Mekenzi (Kenneth F. McKenzie) Shef i J-5 (Drejtor për Politika dhe Planifikimet Strategjike) të Komandës së Bashkuar të Ushtrisë së SHBA-ve. Në takim komandant Rama e ka njoftuar gjeneralin Mekenzi për zhvillimet dhe arritjet e FSK-së, me përgatitjet dhe procesin e transformimit të FSK-së në Forca të Armatosura (FAK). Me këtë rast gjenerali Mekenzi edhe në herë konfirmoi mbështetjen e SHBA-ve ashtu si deri më tash për FSK-në edhe në të ardhmen pas transformimit në FAK”, thuhet në njoftimin për media.

Me këtë rast gjenerali Mekenzi i njoftoi komandantin Rama lajmin e mirë për pranimin e dy kadetëve të FSK-së në akademinë ushtarake në Vest point (West Point), akademi kjo me traditë të gjatë mbi 200 vjeçare dhe më e njohura në botë. Dy kadetët e pranuar të FSK-së janë Arilena Shala dhe Ylli Dalladaku.

Gjatë ditës së sotme delegacioni i MFSK-së dhe FSK-së me në krye ministrin Haki Demolli dhe komandantin e FSK-së gjenerallejtënant Rrahman Rama do të vazhdojnë takimet në Pentagon, Departamentin e Shtetit dhe në Këshillin Kombëtar të Sigurisë./Telegrafi/