Gjasula, i lumtur për rikthimin

Jurgen Gjasula i është rikthyer fushës së blertë pas një kohe të gjatë. Futbollisti shqiptar ka luajtur në fund të ndeshjes së fundjavës për ekipin e tij Duisburg, në humbjen nga Munchen 1860, 1:3. 27 vjeçarit iu desh të priste 215 ditë, për ta shijuar sërish një lojë futbolli. “Ishte një ndjenjë e jashtëzakonshme të zbrisja sërish në fushë”, ka thënë futbollisti tiranas për mediat gjermane.

Gjasula nuk është ende në formën më të mirë, pas problemeve me zemër që kishte gjatë verës së vitit që shkoi. Mirëpo, me punë, ai do të jetë i gatshëm për skuadrën nga liga e dytë gjermane. “Kur loja ishte e vendosur, ia dhashë rastin Gjasulës. Edhe pse ai nuk është në formën optimale, mendoj se vendimi im ishte i drejt”, deklaroi trajneri i Duisburgut, Kosta Runjaic.

Sigurisht, Gjasula mezi pret që të rikthehet si në kohërat më të mira dhe besimi nga trajneri Runjaic për të nuk mungon. Fatmirësisht, futbollisti shqiptar e kaloi problemin serioz kardiak që e pati dhe tash mund ta shijojë çdo minutë në fushën e gjelbër.