GIZ mbajti punëtori në Viti për marketingun regjional

Viti – Në organizim të GIZ-it gjerman, është mbajtur sot në Viti punëtoria me temë “Marketingu regjional”, ku merrnin pjesë përfaqësues të drejtorive komunale të komunave të Anamoravës.

Qëllimi i mbajtjes së kësaj punëtorie ishte përzgjedhja e një organizate, e cila do të merrej me përkrahjen e prodhimeve vendore-regjionale që kultivohen në këtë rajon. Mustafë Kastrati përfaqësues i GIZ-it, ka bërë të ditur për kriteret që kërkohen në projektet që janë dorëzuar nga komunat.

Ndërsa zv. kryetari i komunës së Vitisë Hasan Aliu ka theksuar rëndësinë e madhe që kanë këto takime, që kanë për qëllim mbështetjen e prodhimtarisë vendore.

Ai inkurajoi pjesëmarrësit që të shfrytëzojnë të gjitha mënyrat për të shënuar rezultate sa i përket produkteve që prodhohen në rajonin e Anamoravës. Kurse Ludëig Gar ekspert gjerman, duke prezantuar programin e një marketingu regjional, ka bërë një krahasim të prodhimtarisë kosovare dhe marketingut këtu me atë që e ka të instaluar shteti gjerman.

Ai gjithashtu foli për cilësinë që duhet të ketë produkti, sikurse kërkon edhe një bashkëpunim i palëve me interes, në mënyrë që të ketë rezultate të mira. Eksperti gjerman në këtë prezantim, është fokusuar edhe në konceptin që do të punojë në të ardhmen organizata e prodhimeve regjionale dhe mënyrat e funksionimit të saj. Komunat prezent, kanë prezantuar projektet e tyre dhe prej tyre do të bëhet përzgjedhja e organizatës që do të merret me marketingun dhe plasimin e prodhimeve në treg./rajonipress/