Gërxhaliu: Të dihen përgjegjësit e dështimit të PTK-së

Dështimi i procesit të privatizimit të PTK-së i ka krijuar imazh të keq Kosovës dhe për këtë duhet të kërkohen përgjegjësit.

Kështu ka thënë në një intervistë për “Tribuna”, Safet Gërxhaliu, drejtor i Odës Ekonomike të Kosovës.

Ai po ashtu thotë se kompania “Axos” do ta padisë qeverinë e Kosovës për dështimin.

Sipas kryetarit të OEK-ut, Qeveria nuk mund të nisë një privatizim të ri pa e mbyllur këtë dosje dhe këtë proces të dështuar.

Ai vlerëson se nukmund të shitet PTK-ja brenda tre muajve, siç është raportuar në media, pasi që nuk ka mundur të shitet brenda një viti. Gërxhaliu mendon se me dështimin e këtij procesi Kosova ka krijuar një imazh të keq tek investitorët dhe për këtë arsye duhet të gjinden fajtoret.

Sipas të parit të OEK-ut për shitjen e Postës, Qeveria nuk ka pasur nevojë të kërkojë fare miratimin e Kuvendit, por siç thotë ai kjo është bërë vetëm për ta larguar barrën nga vetja.

E për këtë dështim, Gërxhaliu thotë se Qeveria e Kosovës nuk do të kalojë lehtë me kompanitë “Axos”, duke thënë se ato do të kërkojnë të drejtën e tyre.

Ai ka frikë se pas tërë këtij procesi do të largohen investitorët serioz nga tregu i Kosovës.