Gërvalla: Zgjedhjet e reja erdhën pasi opozita nuk bashkëpunoi në asnjë fazë të proceseve politike

Ministrja në detyrë e Punëve të Jashtme dhe Diasporës, Donika Gërvalla, ka folur për zhvillimet rreth zgjedhjeve të reja dhe bashkëpunimin me opozitën.

Gërvalla tha se Qeveria ka bërë çdo përpjekje për të mos e dërguar vendin në zgjedhje për herë të katërt, por sipas saj, opozita nuk ka bashkëpunuar në asnjë fazë të procesit.

“Ne tentuam të bëjmë gjithçka për të mos e dërguar vendin për herë të katërt në zgjedhje. Mirëpo, çfarëdo që bënim, nuk funksiononte me opozitën. Ata nuk reagonin dhe nuk bashkëpunonin,” tha Gërvalla.

Ajo shtoi se opozita ka qenë e fokusuar vetëm në bllokimin e procesit politik.

“Opozita ka treguar se nuk ka pasur asgjë tjetër përveç që ta bllokojë procesin. Në fund të fundit, kjo ka qenë një përpjekje për ta ndryshuar rezultatin e votuesve – 42% – dhe për t’i shpallur ata humbës. Një gjë e tillë nuk funksionon dhe as nuk do të funksionojë,” u shpreh ajo.

Gërvalla theksoi se pavarësisht pengesave, Qeveria ka vepruar në përputhje me ligjet dhe interesin e qytetarëve./teve1