Gërvalla: Edhe aleatët tanë e kanë kuptuar se Vuçiqi dhe Putini janë të gatshëm për çdo eskalim, përshirë edhe luftën

Ministrja e Punëve të Jashtme, Donika Gërvalla tha sot në konferencën për media pas mbledhjes së Qeverisë se gjatë vitit 2023 kanë investuar në siguri dhe mbrojtjen e vendit dhe sipas saj shteti sot është më i fortë në mbrojtje se kurrë më parë.

Gërvalla në konferencën e përbashkët për media me kryeministrin Albin Kurti tha se forcimi i shtetit ligjor është ajo për të cilën janë votuar dhe të cilën po e zbatojnë përkundur rezistencës dhe kundërshtimeve.

Ajo tha se tejkalimi i kuotës së NATO-s prej më shumë se 2 për qind të GDP-së për mbrojtje është një prej treguesve të dukshëm të fokusit të Qeverisë për sektorin e sigurisë.

“Prania e aleatëve, partnerëve tanë, sidomos e KFOR-it ka rëndësi strategjike jo vetëm për Kosovën, por edhe për paqen në Evropën Juglindore”, tha ajo, gjersa shtoi se kontingjenti i ushtarëve të KFOR-it është rritur nga 4500 në 5500 brenda disa javësh.

“Mendoj se edhe aleatët tanë e kanë kuptuar se Vuçiqi dhe Putini janë të gatshëm për çdo eskalim, përshirë edhe luftën”, tha ministrja, gjersa shtoi se strategjia për zmbrapsjen e tyre nuk mund të jetë përkëdhelja por vendosmëria për mbrojtjen e paqes. /Telegrafi/