Gërbeshët i hetojnë edhe gjermanët

Familja Gërbeshi e cila njihet në komunën e Vushtrrisë për fajde, nuk është e njohur vetëm për Prokurorinë e EULEX-it dhe gjyqësorin kosovar. Disa pjesëtarë të kësaj familjeje janë nën llupën e hetuesisë së shtetit gjerman.

Musa Gërbeshi (56) është i dyshuari kryesor për misionin EULEX në Kosovë në kuadër të pesëmbëdhjetë të dyshuarve që ky mision është duke i hetuar në Kosovë.

Trembëdhjetë nga pesëmbëdhjetë të dyshuarit në Kosovë janë nga familja Gërbeshi. Një pjesëtar i kësaj familjeje, Adem Gërbeshi, i cili ka shtetësi gjermane së bashku me Avdi Gërbeshin, janë duke u hetuar nga shteti gjerman, përkatësisht nga Bavaria Neu-Ulm KPIZ. Një pjesëtar tjetër i kësaj familjeje, Tahir Gërbeshi, është i dënuar për grabitje në Gjermani, madje me burgim që nga viti 2010 deri në vitin 2019.

Se pjesëtarët e familjes Gërbeshi janë duke u hetuar nga shteti gjerman, bëhet me dije në shkresat e lëndës së Gërbeshëve të cilat i posedon “Zëri”. Prokurorja e misionit EULEX, Neeta Amin, e cila u ka rënë në gjurmë krimeve të kësaj familjeje në Kosovë, thotë në kërkesën për caktimin e paraburgimit ndaj të pandehurve se informatat që i ka shteti gjerman, do të kërkohen nga Prokuroria vendore./zeri/