George Lucas fal 1 miliard dollarë për bamirësi

Los Angeles – Regjisori i njohur i filmave fantastikë shkencorë, George Lucas ka vendosur që rreth një miliard dollarë nga paratë që do t`i marrë me shitjen e perandorisë së tij filmike t`i dhurojë për qëllime bamirëse.

Kompania Disney ka blerë kompaninë Lucasfilm për 4 miliardë dollarë. Gjysma e kësaj shume do t`i shkojë në konto regjisorit Lucas si para e gatshme, ndërsa gjysma tjetër si aksione të Disneyt, njofton magazina amerikane “The Hollywood reporter”, transmeton albinfo.

Regjisori i njohur, sidomos për filmin tashmë legjendar “Star Wars”, i ishte bashkuar para dy vjetësh iniciativës së themeluesit të Microsoftit, Bill Gates, dhe miliarderit tjetër Warren Buffet, për të dhuruar më shumë se gjysmën e pasurisë së për qëllime humanitare.

Ai ndjehet i lumtur për mundësinë që i është dhënë që këtë periudhë të jetës së tij dhe pasurinë ta orientojë nga bamirësia.

Shumicën e të hollave ai do t`ia dhurojë një fondacioni për arsim.